સાણંદ હવે બનશે સેમિકન્ડક્ટરનું હબ

ગુજરાતમાં દેશના પ્રથમ કમર્શિયલ સેમિકન્ડક્ટર યુનિટ માટે અમેરિકી કંપની સાથે થયા સમજૂતી કરાર..

- 

ઈલેક્ટ્રોનિક્સ અને ઈન્ફોર્મેશન ટેક્નોલૉજી પ્રધાન અશ્વિની વૈષ્ણવ સાથે મુખ્ય મંત્રી ભૂપેન્દ્ર પટેલઃ ગુજરાત લેશે નેતૃત્વ.

ટાટાની નૅનો કારથી દેશભરમાં જાણીતું બનેલું ગુજરાતનું સાણંદ બહુ ઓછાં વર્ષોમાં ઑટો હબની ઓળખ પામ્યું. હવે સાણંદ એક વધુ નવતર ઉદ્યોગનું પણ કેન્દ્ર બનશે, જે ગુજરાતની કાયાપલટ કરશે. આ ઉદ્યોગ એટલે સેમિકન્ડક્ટર. સાદી ભાષામાં કહીએ તો મેમરી કે માઈક્રો ચિપ, જેનો મોબાઈલ, કમ્પ્યુટર, ઑટોમોટિવ, ઈલેક્ટ્રોનિક્સ, વગેરેમાં ઉપયોગ થાય છે. એના ઉત્પાદનમાં ચીન, અમેરિકા, વગેરે દેશો અગ્રસર છે. તાજેતરમાં અમેરિકાના વિખ્યાત સેમિકન્ડક્ટર ઉત્પાદકે ભારતમાં એમનો પ્રથમ પ્લાન્ટ નાખવા સાણંદની પસંદગી કરી છે.

આ યોજનાનાં મૂળ નખાયાં ગયા મહિને. વડા પ્રધાન નરેન્દ્ર મોદીએ અમેરિકાની મુલાકાત સમયે અમેરિકી રાષ્ટ્રપ્રમુખ જો બાઈડન સાથે બેઠક યોજી હતી. એ સમયે ભારતને ગ્લોબલ સેમિકન્ડક્ટર સપ્લાય ચેન મૅન્યુફેક્ચરિંગ દ્વારા આત્મનિર્ભર બનાવવા ૧૦ અબજ અમેરિકી ડૉલર (આશરે ૮૨૦ અબજ રૂપિયા)નો સેમિક્રોન ઈન્ડિયા પ્રોગ્રામ જાહેર કર્યો હતો. એના ભાગ રૂપે અમેરિકાની માઈક્રોન ટેક્નોલૉજી ઈન્કૉર્પોરેશન ભારતમાં (વાંચો, ગુજરાતના સાણંદમાં) જંગી મૂડીરોકાણ કરીને સેમિકન્ડક્ટર પ્લાન્ટ બનાવશે એવી જાહેરાત થઈ.

વડા પ્રધાન નરેન્દ્ર મોદી ભારત પરત ફર્યા પછી આ મહત્ત્વાકાંક્ષી પ્રોજેક્ટ માટે ઘડિયાં લગન લેવાયાં! અમેરિકામાં જાહેરાત થયાના માત્ર છ દિવસમાં તમામ ઔપચારિકતા પૂરી કરીને ગુજરાત સરકાર અને માઈક્રોન ટેક્નોલૉજી ઈન્કૉર્પોરેશન વચ્ચે પાટનગર ગાંધીનગરમાં સમજૂતી કરાર (મેમોરેન્ડમ ઑફ અન્ડરસ્ટૅન્ડિંગ-એમઓયુ) થયા.

હવે દેશના પ્રથમ કમર્શિયલ સેમિકન્ડક્ટર મેમરી એસેમ્બ્લી અને ટેસ્ટ યુનિટ માટે અમેરિકી કંપની માઈક્રોન ટેક્નોલૉજી ૨.૭૫ અબજ અમેરિકી ડૉલર (અંદાજે રર,પ૦૦ કરોડ રૂપિયા)નું રોકાણ કરીને સાણંદના જીઆઈડીસીમાં સેમિકન્ડક્ટર એસેમ્બ્લી ટેસ્ટિંગ, માર્કિંગ અને પૅકેજિંગ (ATMP) ફેસેલિટીઝ બનાવશે.