OTT પ્લૅટફૉર્મ્સઃ શું જોવું? શેનાથી ચેતવું?

તમારી મનપસંદ ફિલ્મ કે વેબ-સિરીઝ જુઓ, પણ પોતાની ચૅનલ બનાવીને રોકડી કરવાની લાલચથી બચજો.

- 

ઘીસીપીટી ટીવીસિરિયલોથી અને પરંપરાગત સિનેમાઘરોથી બોર થયેલી દેશની જનતા હવે સ્ટ્રીમિંગ સર્વિસ આપતાં OTT પ્લૅટફૉર્મ્સ તરફ ઝડપથી આગળ વધી રહી છે. ટીવી સ્ટ્રીમિંગની શરૂઆત નેટફ્લિક્સ કંપનીએ અમેરિકામાં કરી હતી. આજે તો દુનિયાના વિકસિત કહેવાય એવા મોટા ભાગના દેશોમાં નેટફ્લિક્સ કાર્યરત છે. આપણા દેશની વાત કરવાની હોય તો નેટફ્લિક્સ ઉપરાંત એમેઝોન પ્રાઈમ, ડિઝની +હૉટસ્ટાર, સોની, JIO Cinema, ZEE5 અને શેમારુમી ઉપરાંત બીજી અનેક OTT સેવા છેલ્લાં કેટલાંક વર્ષોમાં ઉમેરાઈ છે.

OTT પ્લૅટફૉર્મ મારફતે મનોરંજન સામગ્રી વેચવાનો ધંધો ઘણો મોટો છે. દેશમાં અત્યારે ૧૨ કરોડથી પણ વધુ લોકોએ પોતાને ગમતા કોઈ ને કોઈ OTT પ્લૅટફૉર્મની ફી ભરીને મેમ્બરશિપ ખરીદેલી છે અને એમના પરિવાર અને મિત્રોને ગણો તો તો ૪૨ કરોડથી પણ વધુ લોકો OTT પ્લૅટફૉર્મનો ઉપયોગ કરી રહ્યા છે. આટલો વિશાળ ગ્રાહકવર્ગ હોવાથી મોટા ભાગની કંપનીઓ અત્યારે કરોડો રૂપિયાનો નફો કરી રહી છે.