ગુજરાતનાં વિહંગોની પ્રથમ ફીલ્ડ ગાઈડ તૈયાર

ગુજરાત પક્ષીનિરીક્ષણ માટે જાણીતું છે, કારણ કે અહીં પક્ષીની જાતિઓનું વૈવિધ્ય અને એમની સંખ્યા અન્ય કેટલાંક રાજ્યોની સરખામણીમાં વધુ છે, પરંતુ રાજ્યકક્ષાની એક બર્ડ ફીલ્ડ ગાઈડની ખોટ હતી

- 

ઈકો ટુરિઝમ હવે ગુજરાતમાં પાંખો વિસ્તારી રહ્યું છે. અહીં પક્ષીનિરીક્ષણ તથા પક્ષીઓની તસવીર ખેંચવાનો શોખ ધરાવતા ફોટોગ્રાફરની સંખ્યા પણ વધી રહી છે ત્યારે એમને મદદરૂપ થાય એવો એક ઉપક્રમ હમણાં બર્ડ કન્ઝર્વેશન સોસાયટી-ગુજરાત (બીસીએસજી) દ્વારા હાથ ધરવામાં આવ્યો. એ છે અ ફીલ્ડ ગાઈડ ટુ ધ બર્ડ્સ ઑફ ગુજરાતનું પ્રકાશન. અ ફીલ્ડ ગાઈડ ટુ ધ બર્ડ્સ ઑફ સાઉથ એશિયા અને અ ફીલ્ડ ગાઈડ ટુ ધ બર્ડ્સ ઑફ ઈન્ડિયા જેવી માર્ગદર્શિકા ઉપલબ્ધ હતી જ, હવે અ ફીલ્ડ ગાઈડ ટુ ધ બર્ડ્સ ઑફ ગુજરાત એ નામે પ્રગટ થયેલી માર્ગદર્શિકામાં પ્રકાશિત માહિતી અને આંકડા રસપ્રદ અને જાણવાલાયક છે. ઉલ્લેખનીય છે કે ગુજરાતનાં પક્ષીઓ પરની ફીલ્ડ ગાઈડ બુક પ્રથમ વાર જ તૈયાર થઈ છે.