ચંદામામા, ભાણીબહેનને આવકારવા તૈયાર રહેજો

સર્ફિંગ અને યોગ હશે અવકાશેથી પૃથ્વી પર પાછા ફર્યા બાદ ક્રિસ્ટીનાનાં ફેવરીટ કાર્યો.

- તનીશા

પેલી હોલીવૂડની સાયન્સ ફિક્શન ફિલ્મોમાં આપણે જોયું છે કે પૃથ્વી પરથી કોઈ મિશન પરગ્રહ પર જાય તો એમાં ચાર-પાંચ પુરુષો જોડે રૂપ રૂપના અંબાર જેવી એકાદ-બે સુંદરી તો હોય જ. આ નમણી નારો જો કે કરાટે ને એવું બધું પણ જાણતી હોય અને પરગ્રહના વિલનો જોડે કે પછી પોતાના જ કોઈ વંઠેલા સાથી જોડે બરાબરનું ઢિશૂમ ઢિશૂમ પણ કરી નાખે.

આપણું બોલીવૂડ કમનસીબે પરગ્રહના દિલધડક પ્રવાસો પર બહુ ફિલ્મ બનાવતું નથી એટલે આપણે અવકાશની હેરતંગેઝ દુનિયા વિશે બહુ રુચિ કેળવી શક્યાં નથી. હા, વર્ષો પહેલાં ભારતના રાકેશ શર્મા સ્પેસમાં ગયા ત્યારે એક જબરી ઉત્કંઠા પેદા થઈ હતી. પછી કલ્પના ચાવલા અને સુનિતા વિલિયમ્સ જેવી અવકાશવીરાંગનાઓ વતી અવકાશી ખેપમાં ગઈ ત્યારે પણ આપણા અમેરિકા યુવાનિયાઓમાં અવકાશવિજ્ઞાન વિશે થોડું આકર્ષણ થયું હતું ખરું. કલ્પના ચાવલાનું અવકાશી અકસ્માતમાં મોત થયા પછી અમારા મુંબઈના ઉપનગર બોરીવલીમાં તો એક જંક્શનને કલ્પના ચાવલા ચોક એવું નામ આપવામાં આવ્યું છે. સુનિતા વિલિયમ્સ ભારત આવીને ગુજરાતનાં અનેક શહેરોમાં ફરી હતી.