પ્રવાસ એટલે રૂટિનમાંથી બ્રેક અને ચેન્જ.. ડૉ. રુચિ-ડૉ. અર્પિત દોશી મુંબઈ

ડૉક્ટરદંપતીનો બીજો એક નિયમ એ છે કે ઘરેથી નીકળે ત્યારે થેપલાં, ખાખરા, ફરસાણ કે ફૂડનું એક પણ પડીકું સાથે નહીં લેવાનું. જ્યાં જવું ત્યાંનું હેલ્દી વેજિટેરિયન ફૂડ ખાવામાં એમને કોઈ પ્રોબ્લેમ નથી

- 

ઈશાન મુંબઈમાં વસતાં ઑર્થોડોન્ટિસ્ટ દંપતી ડૉ. રુચિ અને ડૉ અર્પિત દોશીનો ટ્રાવેલ ફંડા જરા હટકે છેઃ ઓછા દિવસ માટે, ઓછા જાણીતા સ્થળે જવાનું, લક્ઝુરિયસ પ્રૉપર્ટી (હોટેલ-રિસોર્ટ્સ)માં રહેવાનું, મિત્રો-સગાંસ્નેહીઓ સાથે નહીં, પણ સજોડે જ જવાનું.

કેમ સાવ એકલાં? એવા સવાલના જવાબમાં ડૉ. અર્પિત કહે છેઃ ‘ફ્રેન્ડ્સ, રિલેટિવ્સ સામે કોઈ જ વાંધો નથી, પણ જેમને આપણે મુંબઈમાં સતત મળતાં હોઈએ એ જ લોકો સાથે અથવા એવા જ લોકો સાથે વૅકેશન પર જઈએ તો એ વૅકેશન કેવી રીતે થયું? આઠ-દસનું ગ્રુપ હોય એટલે કોઈ વહેલું-મોડું થાય, સતત એ જ વાતો થાય, જે મુંબઈમાં કરતાં હોઈએ, કોઈને અમુક ફૂડ જોઈએ ને ઈન્ડિયન રેસ્ટોરાં શોધવામાં સમય બગાડે, જ્યારે અમારે માટે ફડ સૌથી છેલ્લે આવે. અમે કૉફી-બિસ્કિટ્સ, ફ્રૂટ્સ-સૅલડથી પણ ચલાવી લઈએ. અમે શાકાહારી છીએ, પણ ફ્લેક્સિબલ છીએ. રોજિંદા જીવનથી કપાઈ જઈને પ્રવાસ પર જવું એ એક અનુભવ છે. એ એક્સપિરિયન્સ માણો. બ્રેક અને ચેન્જ જોઈતાં હોય તો એકલાં જ જવું જોઈએ.’

મનાલી નજીક નગરનો નજારો તથા બરફાચ્છાદિત આલ્પ્સ વચ્ચે નિવાસ.

અહીં ડૉ. રુચિ ઉમેરે છે કે અમે ફરવા ઉપરાંત અન્ય દેશોમાંથી આવેલા પ્રવાસીઓ, ખાસ કરીને યુરોપના ધોળિયા લોકો સાથે ગપ્પાં મારીએ, એમના દેશ વિશે, સંસ્કૃતિ વિશે, ભોજન વિશે જાણીએ-સમજીએ.