અસ્તિત્વને પરિભાષિત કરવાની ભુલભુલામણી..

સજાતીય લગ્નને કાયદેસર માન્યતા આપવાની માંગણીના મુદ્દે અત્યારે સુપ્રીમ કોર્ટમાં સામસામી દલીલ થઈ રહી છે ત્યારે મુંબઈના ગુજરાતી પરિવારમાં જન્મેલો, સમલૈંગિક સમુદાયમાંથી આવતો ૩૪ વર્ષી યુવાન પોતાના અનુભવ ‘ચિત્રલેખા’ સમક્ષ વર્ણવે છે.

- કેતન મિસ્ત્રી (મુંબઈ)

કુશલઃ ઈલૅન્ડમાં પહેલી વાર એક ફ્રેન્ડ સામે રહસ્યોદ્ઘાટન કર્યું, પણ મારી અંદર તો એ વરસોથી ઘર કરીને બેઠું હતું.

રાણીના દેશ ઈંગ્લૅન્ડમાં વસતા કુશલ બંધારનો જન્મ-ઉછેર મુંબઈના એક ગુજરાતી જૈન પરિવારમાં થયો. પરિવારમાં ત્રણ જણઃ મમ્મી, પપ્પા અને કુશલ. નાનપણથી જ કુશલ એકલવાયો અને જુદો હતો. એને પોતાની સંગતમાં જ રહેવું ગમતું. હા, ઈતર પ્રવૃત્તિમાં એ તેજ. સાહિત્યલેખન, વાંચન, અભિનય, વક્તૃત્વમાં સક્રિય. પરીક્ષામાં હંમેશાં પહેલો નંબર લાવે, વિવિધ સ્પર્ધામાં ઈનામો જીતે. ૧૨મીની પરીક્ષામાં કુશલને આખા મહારાષ્ટ્રમાં ૧૩મી રૅન્ક મળી તો સીએ એન્ટ્રન્સ (સીપીટી)માં ભારતમાં ૧૦મી રૅન્ક!

કુશલ ૨૧નો થયો અને અનુસ્નાતક કરવા ઈંગ્લૅન્ડ ગયો એ એના જીવનનો અગત્યનો વળાંક હતો. ઘરથી દૂર રહેવાનો પહેલો અનુભવ હતો. જીવનનાં ૨૧ વરસમાં નહોતો શીખ્યો એટલું એ એક વરસમાં શીખ્યો. સુખી હોવું શાને કહેવાય, તે એ વર્ષે આ અનુભવથી સમજાયું.

પોતે હોમોસેક્સ્યુઆલિટી તરફ ઢળી રહ્યો છે એવી પ્રતીતિ ક્યારે થઈ એ વિશે કુશલ કહે છેઃ ‘મને હંમેશથી અંદેશો તો હતો જ. બાળપણમાં, લૈંગિક પરિપક્વતા આવી એની પણ પહેલાં મને લૈંગિક પરિપક્વતા આવી એની પણ પહેલાં મને છોકરી કરતાં છોકરાઓ પ્રત્યે એક પ્રકારનું ભાવનાત્મક આકર્ષણ રહેતું. સમય થતાં શારીરિક આકર્ષણ પણ ઊપજ્યું. ટૂંકમાં, એવી કોઈ એક ચોક્કસ ક્ષણ નહોતી, જ્યારે અચાનક એનો ભાસ થયો. જન્મથી જ એ મારા અસ્તિત્વનો ભાગ રહ્યો છે. બસ, આ સત્યને શબ્દોમાં બાંધવામાં સમય લાગી ગયો. ૨૧ વરસે ઈંગ્લૅન્ડમાં પહેલી વાર એક બહેનપણી પાસે આ રહસ્યોદ્ઘાટન કર્યું, પણ મારી અંદર તો વરસોથી આ રહસ્ય ઘર કરીને બેઠું હતું.’