શેરીયુદ્ધના ભણકારા સાંભળવા તૈયાર રહો!

ગયા વર્ષે ભાજપનો સાથ લઈ મહારાષ્ટ્રમાં સરકાર બનાવનારા એકનાથ શિંદે જૂથને અસલી પક્ષ તરીકે માન્યતા મળવાની સાથે ‘શિવસેના’નો ઠાકરેપરિવાર સાથેનો નાળ-સંબંધ તૂટ્યો છે, પણ પાયાના કાર્યકરોનું વલણ હજી અકળ છે.

- હીરેન મહેતા

‘શિવસેના’ તરીકે માન્યતા મળ્યા પછી એકનાથ શિંદે જૂથના કાર્યકરોની ઉજવણીઃ હજી ફટાકડા ફૂટવાના બાકી છે.

ચૂંટણીપંચે એનો ફેંસલો આપી દીધો છે. સભ્યસંખ્યા અને મહારાષ્ટ્ર વિધાનસભાની છેલ્લી ચૂંટણીમાં મળેલા મતની ટકાવારીના આધારે ગયા વર્ષે શિવસેનામાંથી છૂટા પડેલા એકનાથ શિંદે જૂથને ચૂંટણીપંચે હવે શિવસેના પક્ષ તરીકે વિધિવત્ માન્યતા આપી છે. સ્વાભાવિક છે કે ધનુષ્ય-બાણનું ચૂંટણીપ્રતીક પણ એમને ફાળે જાય. શિવસેનાના બહુમતી વિધાનસભ્યો (પંચાવનમાંથી ૪૦) આ જૂથ પાસે હોવાથી અને મહારાષ્ટ્રમાં શિંદે જૂથે ભાજપ સાથે મળી સરકાર પણ બનાવી લીધી હોવાથી ચૂંટણીપંચનો આ નિર્ણય અપેક્ષિત હતો.

પંચના ફેંસલાને સેનાના સ્થાપક પ્રમુખ બાળ ઠાકરેના પુત્ર ઉદ્ધવ ઠાકરેએ સર્વોચ્ચ અદાલતમાં પડકાર્યો છે, પરંતુ ન્યાયતંત્ર એ નિર્ણય બદલે એવી શક્યતા પાંખી છે. સર્વોચ્ચ અદાલતમાં સેનાના વિભાજન સમયની પણ એકથી વધુ અરજી હજી અનિર્ણાત પડી છે. એમાં હવે ચૂંટણીપંચના નિર્ણય સામેની અરજીનો ઉમેરો થયો છે.