તુલસી ઈસ સંસાર મેં ભાત ભાત કે સ્ટ્રેસ-બસ્ટર

રિલેશનશિપથી લઈને સોશિયલ મિડિયાને કારણે આવતા નવા જમાનાનાં નવાં સ્ટ્રેસ અને એને ટાળવાના ઉપાય..

- કેતન મિસ્ત્રી (મુંબઈ)

મુકેશ અપસેટ છેઃ મુંબઈથી લખનૌની ફ્લાઈટ પકડવા એણે પરામાંથી ઍરપોર્ટ જવાનું છે અને ગૂગલ મૅપ જણાવે છે કે હાઈ-વે જામ છે, પોણા બે કલાક લાગશે. આનો મતલબ ફ્લાઈટ ગઈ? મુકેશને અચાનક ફ્લાઈટ ગુમાવવાનો ભાર વરતાવા માંડે છે..

ઈંગ્લૅન્ડની (એનએચએસ)નો નૅશનલ હેલ્થ સર્વિસ એક અભ્યાસ કહે છે કે જો મગજ ભાર અનુભવતું હોય તો પહેલું કામ કરવાનું છે એનું કારણ શોધી નિવારણ લાવો, જેમ કે મુકેશ.. એ ટૅક્સીને બદલે લોકલ ટ્રેનમાં જાય છે ને આરામથી નિયત સમયે ઍરપોર્ટ પહોંચી જાય છે. આ થયું એવું સ્ટ્રેસ, જેનો ઉપચાર શક્ય છે. એ ઉપચાર અમલમાં મૂકશો તો જ જીવનમાં આગળ વધી શકશો.

નવા જમાનાનાં નવાં સ્ટ્રેસ પારંપરિક સ્ટ્રેસ કરતાં વધારે ખતરનાક.

હવે માનો કે ઍરપોર્ટ પહોંચ્યા બાદ મુકેશને જાણ થાય છે કે જેને માટે આટલી માથાકૂટ કરી એ ફ્લાઈટ ચાર કલાક મોડી ઊડશે. આ પરિસ્થિતિ એવી છે, જેની પર મુકેશનો (કે કોઈનો) કન્ટ્રોલ જ નથી. એણે તો ચા કે કડક કૉફી પીતાં પીતાં ફ્લાઈટની પ્રતીક્ષા જ કરવાની છે.