જોજો, ક્યાંક શમશેરાવાળી ન થાય..

આગામી ફિલ્મ ‘એનિમલ’માં રણબીર કપૂર: ખૂનખાર લાતું પ્રાણી મીંદડી તો નહીં નીકળે ને?

- 

એયને જલસાઘના બાશિંદાવને હપ્પી ગ્રેગોરિયન ન્યુ યર.. ૩૧, પહેલી ને બીજી એમ ધમાકેદાર છુટ્ટી બાદ કામે ચઢવાનું રઘુનું દિલ તો થાતું નો'તું, પણ પછી તંત્રી સાહેબનો કડક વ્હૉટ્સઍપ મેસેજ આવતાં આળસ મરડી લૅપટૉપ ઉઘાડવું પડ્યું.

કામ કરવાનો મૂડ ન આવવાની એક વજહ ફિલ્મ સરકસ પણ હતી, જે જોઈને રઘુ ઑલમોસ્ટ ડિપ્રેશનમાં સરી પડ્યો હતો. એમાં એવું છે કે કોઈ ખાંડ વગરની કૉફી પીવે તો કોઈ દૂધ વગરની બ્લૅક કૉફી.. કોઈ વળી ખાંડ-દૂધ વગરનીય કૉફી પીવે, પણ કૉફી વગરની કૉફી તો ન જ હોય ને? સરકસનું કંઈ આવું જ હતું: મોટા પાયે એનો ફુલ ધમ્માલ કૉમેડી ફિલ્મ તરીકે પ્રચાર કરવામાં આવેલો, પણ એ તો નીકળી કૉમેડી વિનાની કૉમેડી ફિલ્મ! રોહિત શેટ્ટીને એમ કે પ્રેક્ષકોમાં ઝાઝી કંઈ બુદ્ધિ તો છે નહીં. એ તો કૉમેડિયનોને ખાલી પરદા પર જોઈને જ ખડખડ હસવા માંડશે. ફિલ્મમાં રમૂજી સંવાદોની જરૂર શું છે? હેં? આવો અતિઆત્મવિશ્વાસ એમને ભારી પડી ગયો અને..