ઈલેક્શનનો અવસર.. સિલેક્શનની આઝાદી

વિધાનસભા માટે નવા મુરતિયા પસંદ કરવાનો તખતો ઘડાઈ રહ્યો છે ત્યારે જાણો, શું છે ચૂંટણી માટેની તૈયારી? ગુજરાતના ચીફ ઈલેક્શન ઑફિસર સાથે વિશેષ મુલાકાત..

- મહેશ શાહ (ગાંધીનગર)

મતદાર જાગૃતિ માટે ‘અવસર’ રથથી માંડી સેલ્ફી બૂથ સુધીની તૈયારી ચાલી રહી છે તો ચૂંટણી દરમિયાન ગેરરીતિ ટાળવા ૮૦૦થી વધુ સ્ટેટિક સર્વેલન્સ ટીમ પણ તહેનાત કરવામાં આવી છે.

ગુજરાતમાં ઠંડીની મોસમ શરૂ થઈ છે. જો કે ચૂંટણીની ગતિવિધિઓથી ભારે ગરમાવો આવ્યો છે. પાછલી વિધાનસભાની જેમ આ વખતે પણ ગુજરાત વિધાનસભા ૨૦૨૨ની ચૂંટણી બે તબક્કામાં એટલે કે એક અને પાંચ ડિસેમ્બરે યોજાશે. આ વખતે ૨,૫૩,૩૬,૬૧૦ પુરુષો અને ૨,૩૭,૫૧,૭૩૮ મહિલાઓ મળીને કુલ ૪,૯૦,૮૯,૭૬૫ મતદારો છે.

ગુજરાતના ચૂંટણીપંચે આદર્શ આચારસંહિતાના ભાગ રૂપે રાજ્યભરની સરકારી ઈમારતો અને સંકુલો પરથી ૨,૪૧,૧૨૫ તથા ખાનગી મિલકતો પરથી ૫૦,૬૫૨ પોસ્ટર્સ, બૅનર્સ, વૉલ રાઈટિંગ, કટઆઉટ્સ, હોર્ડિંગ્સ, વગેરે દૂર કર્યાં તથા ચૂંટણી અંગેની ફરિયાદો નોંધવા માટે પાટનગર ગાંધીનગરમાં કન્ટ્રોલ રૂમ બનાવ્યો.

રાજ્યના તમામ જિલ્લામાં ફ્લાઈંગ સ્ક્વૉડ, એકાઉન્ટિંગ ટીમ, વિડિયો વ્યૂઈંગ ટીમ અને વિડિયો સર્વેલન્સ ટીમ કાર્યરત છે. ચૂંટણીખર્ચ પર દેખરેખ માટે રાજ્ય ચૂંટણીપંચે GEEMs App (Gujarat Election Expenditure Monitoring Application) બનાવી. ચૂંટણીના સંચાલન માટે ૧૫૦ નિરીક્ષકો છે તો ઉમેદવારોના ખર્ચ પર દેખરેખ રાખવા ૬૯ નિરીક્ષકોને ફરજ સોંપવામાં આવી છે. ચૂંટણીના દિવસોમાં ઉમેદવારો એમના મતદારોને જાતજાતનાં પ્રલોભન આપતા હોય છે, એ રોકવા બનાવવામાં આવેલી ૬૧૧ ફ્લાઈંગ સ્ક્વૉડ અને ૮૦૨ સ્ટેટિક સર્વેલન્સ ટીમે ૬૬ લાખ રૂપિયા રોકડા, ૩.૮૬ કરોડનો દારૂ, ૯૪ લાખનું ડ્રગ્સ, ૧.૮૬ કરોડનું ઝવેરાત તથા ૬૪.૫૬ કરોડનાં ચાઈનીઝ રમકડાં, વગેરે મળીને ૭૧.૮૮ કરોડ રૂપિયાની સામગ્રી જપ્ત કરી છે.