આ ડાઘિયો આટલો આક્રમક કેમ છે?

અમેરિકન પ્રજાતિના પીટબુલ શ્વાન દ્વારા માણસો પર વધી રહેલા હુમલાને કારણે એના પર પ્રતિબંધ મૂકવાની માગણી ઊઠી છે. કાનપુર પાલિકાએ તો આવા કૂતરા પાળવા પર બૅન મૂકી પણ દીધો છે. હવે થયું એવું છે કે પીટબુલને કારણે સ્ટ્રીટ ડૉગની સમસ્યા પણ ચર્ચામાં આવી છે.

- બિમલ મહેશ્વરી (મુંબઈ)

જુલાઈમાં લખનઉમાં પીટબુલ પ્રજાતિના એક પાલતુ કૂતરાએ ૮૨ વર્ષનાં દાદીમા પર એવો અટેક કર્યો કે દાદીમાનું પ્રાણપંખેરું ઊડી ગયું. અન્ય કિસ્સામાં એક માણસને ડૉગ બાઈટને કારણે હૉસ્પિટલમાં દાખલ કરવો પડ્યો.

- પંજાબના ગુરુદાસપુર જિલ્લામાં પીટબુલ કૂતરાએ પંદર કિલોમીટરની હદમાં આવેલાં પાંચ ગામના બાર લોકોને બચકાં ભર્યાં ત્યારે નાછૂટકે એક નિવૃત્ત આર્મીમૅને કૂતરાને ઠાર માર્યો.

- ગાઝિયાબાદમાં પીટબુલ શ્વાને એક બાળકના ચહેરાને લોંચી લીધો તો ચહેરા પર ૧૫૦થી વધુ ટાંકા લેવા પડ્યા.

ઉત્તર પ્રદેશના ગાઝિયાબાદમાં પીટબુલ પ્રજાતિના એક પાલતુ કૂતરાએ છોકરાના મોઢે એવું તો બચકું ભર્યું કે એને દોઢસો ટાંકા આવ્યા..

અન્ય પ્રજાતિના રખડુ શ્વાને હુમલો કર્યો હોય એવા પણ અનેક કિસ્સા બન્યા છે. થોડા દિવસ પહેલાં નવી મુંબઈમાં ઝોમેટોના ડિલિવરી બૉયના ગુપ્તાંગ પર જર્મન શેફર્ડ ડૉગીએ બચકું ભર્યું તો એ જ અરસામાં ગાઝિયાબાદમાં એક પાલતુ ડૉગીએ લિફ્ટની અંદર એક નાના બાળક પર અટેક કર્યો.

અમેરિકન પ્રજાતિના શ્વાન પીટબુલને એકદમ ડેન્જરસ ગણવામાં આવે છે અને એના અચાનક વધી ગયેલા હુમલાને કારણે ફરી એક વાર રખડુ કૂતરાના ત્રાસની સમસ્યાને પણ વાચા મળી છે.

પીટબુલના હિંસક વર્તનનો મુદ્દો ભારતમાં ભલે અત્યારે ઊઠ્યો હોય, પણ અમેરિકા-કેનેડામાં ૨૦૦૯થી ૨૦૧૮ વચ્ચે માણસો પર શ્વાને કરેલા હુમલામાં માત્ર આ એક જ પ્રજાતિ (પીટબુલ)નો હિસ્સો ૮૦ ટકા હતો. અમેરિકા-કેનેડાના અમુક પ્રાંતો ઉપરાંત વિશ્વના અનેક દેશોએ આક્રમક પીટબુલ પર બૅન મૂક્યો છે. હમણાં કાનપુર મહાપાલિકાએ પણ પીટબુલનાં પાલન-ઉછેર પર પ્રતિબંધ મૂક્યો.