જોવાનું ચૂકી ગયા..

આપણાં સીમિત ચશ્માંથી પાર એક એવી દુનિયા વસે છે જે આપણી સામે જ છે, છતાં આપણાથી અજાણી છે. તસવીરમાં બરફ જોઈને હથેળીમાં ઝીલી ન શકાય. આકાશમાંથી કરા ઝીલવાનો રોમાંચ મુંબઈમાં બેસીને કૅચ ન કરી શકાય

- હિતેન આનંદપરા

ચોતરફ દશ્યો હતાં રમણીય ત્યાં

પણ બધાની આંખમાં નંબર હતા.

                             – રાકેશ હાંસલિયા

કુદરતનું વૈવિધ્ય સુવિધાના ઐશ્વર્ય સામે હાર માનતું અવારનવાર જોઈ શકાય છે.

લગભગ ૨૭ વર્ષ પહેલાં કવિ હિમાંશુ પ્રેમનો હાથ ઝાલીને મનાલી ટ્રેકિંગ માટે ગયા હતા. કુદરતને આત્મસાત્ કરવાના ઉદ્દેશ સાથેની આ ટુરમાં ગયા જનમનું વેર હોય એમ સુવિધાઓની સુનિયોજિત બાદબાકી હતી. એ અરસામાં મોબાઈલ નવજાત હતા અને મોંઘા પણ હતા એટલે બચ્ચાંને રમાડવું પોસાય એમ નહોતું.

ગાંધીજી ટાઈપની સફરની અકળામણ તો ઠીક, પણ રહેવાનું પાછું છ હજાર ફીટ ઉપર ટેન્ટમાં. અધૂરામાં પૂરું, પોતાનો સામાન જાતે જ ઊંચકીને બધે પહોંચવાનું. મારું કૂણું કૂણું કોઈ કોરે જ કાળજડુ.. ગીત યાદ આવી જતું.