આમ તો રાજસ્થાન પણ પંજામાંથી જશે..

દેશના રાજકીય નકશામાંથી ધીમે ધીમે અલોપ થઈ રહેલા કોંગ્રેસ પક્ષ માટે રાજસ્થાનનો બળવો ખતરાની ઘંટડી સમાન છે.

- હીરેન મહેતા

અશોક ગેહલોતઃ આ ટોપી પણ પહેરવી છે!

કોંગ્રેસની હાલત અત્યારે એક સાંધો ત્યાં તેર તૂટે એવી છે. વર્ષોથી જ્યાં પક્ષની સત્તા નથી એવાં ઉત્તર પ્રદેશ, બિહાર, પશ્ચિમ બંગાળમાં એનું સમૂળગું અસ્તિત્વ જ જોખમમાં છે. તામિલનાડુ, આંધ્ર અને તેલંગણમાં પ્રાદેશિક પક્ષોએ એનો કાંકરો કાઢી નાખ્યો છે. મહારાષ્ટ્રમાં એના ભોગે શરદ પવારની રાષ્ટ્રવાદી કોંગ્રેસ મજબૂત બની છે અને ગુજરાતમાં અત્યારે ભાજપ સામે કોંગ્રેસ કરતાં આમ આદમી પાર્ટીનું જોર વધુ જામે એવું લાગી રહ્યું છે. છેલ્લી વિધાનસભા ચૂંટણી જીત્યા છતાં મધ્ય પ્રદેશમાં કમલ નાથ અને જ્યોતિરાદિત્ય સિંધિયાની લડાઈમાં સત્તા હાથમાંથી ગઈ તો એ પછી પંજાબમાં અમરિન્દર સિંહની અવગણનાની મોટી કિંમત કોંગ્રેસે વિધાનસભામાં કારમા પરાજય રૂપે ચૂકવવી પડી. બાકી હતું તે, હમણાં ગોવામાં કોંગ્રેસના ૧૧માંથી આઠ વિધાનસભ્યો ભાજપમાં જોડાઈ ગયા.