પ્રવૃત્તિ, પ્રવૃત્તિ ને પ્રવૃત્તિ

નવાઈની વાત કે બા આ ઉંમરે પણ આખા વર્ષનાં દાળ-ચોખા ભરે છે. ઘઉં હજી હમણાં સુધી ઘરઘંટીમાં દળતાં. રસોઈ તો જાતે જ કરવાની. નાસ્તો બનાવવાનો અને બધાને ખવડાવવાનો પણ ખૂબ શોખ

અરુણાબહેન મહેતા ગૃહિણી

બધા એમને બા કહે છે. બા હવેલીએ જાય, સત્સંગમાં ભાગ લે, ગાર્ડનમાં મોર્નિંગ વૉક કે યોગ કરવા જાય અને રેસ્ટોરાંમાંય જાય. નામ અરુણાબહેન રશ્મિકાંત મહેતા. સાડા નવ વર્ષ પહેલાં રશ્મિકાંતભાઈનું અવસાન થયું ત્યારથી અરુણાબહેન એકલાં છે.

ત્રણ-ત્રણ ઉચ્ચ શિક્ષિત પુત્રો અને પૌત્ર-પૌત્રીની લીલી વાડી હોવા છતાં એકલાં કેમ રહો છો?

આ પ્રશ્નના ઉત્તરમાં ૮૨ વર્ષનાં બા ચિત્રલેખાને વિસ્તારથી કહે છે કે જગ્યાની સંકડાશને કારણે દીકરાઓ સુનીલ, કેતન અને તુષાર સમય જતાં જુદા રહેવા ગયા. એમના પપ્પાના અવસાન પછી છોકરાઓનો આગ્રહ તો મને સાથે રાખવાનો જ હતો, પણ મેં ના પાડી. વિશ્વાસ એવો કે એકલી રહીશ તોય દીકરાઓ એકલતા નહીં સાલવા દે.