સજ્જતા સાથે સપનાંની અરજી કરો, પ્રકૃતિનો કૉલ લેટર ગમે ત્યારે આવશે!

વાત શેફાલી વર્માની હોય કે રીન્કુ સિંહની, કેટલીક કહાનીઓ દૈવ તત્ત્વ લખે છે. બસ, એનું આમંત્રણ આપણા સરનામે આવે ત્યારે આપણે તૈયાર હોવા જોઈએ.

- મિલી મેર

ઇન્ડિયન વિમેન્સ ટીમમાં સૌથી યુવા વયે ઓપનર તરીકે રમવાનું શરૂ કરીને જેણે પોતાની છાપ છોડી હતી એવી એક છોકરીએકવીસ વર્ષની છોકરી- છેલ્લા એક વર્ષથી નેશનલ ટીમમાંથી ડ્રોપ થઈ હતી. તાજેતરમાં ભારતીય મહિલા ટીમ ‘વિમેન્સ વર્લ્ડકપ જીતી. એ વર્લ્ડકપ માટેની પંદર ખેલાડીની સ્ક્વૉડ એનાઉન્સ થઈ એમાં એ છોકરીનું નામ પણ નહોતું. સ્ક્વૉડ એનાઉન્સ થવાના સમયે જ એના પિતાને હાર્ટ-ઍટેક આવ્યો હતો. તો એ છોકરીએ પિતાને એક અઠવાડિયા સુધી જણાવ્યું પણ નહીં કે પોતે વર્લ્ડકપ ટીમમાં સિલેક્ટ નથી થઈ. પછી એ છોકરી ડોમેસ્ટિક ક્રિકેટ રમવા લાગી. એની જગ્યાએ જે ઓપનર આવી હતી એ પ્રતિકા રાવલે વર્લ્ડકપની ગ્રૂપ સ્ટેજની સાત મેચમાં ખૂબ સારું પરફોર્મન્સ આપ્યું, પણ સાતમી મેચમાં પ્રતિકા ઈજાગ્રસ્ત થઈ. સેમિફાઇનલના જસ્ટ બે દિવસ પહેલાં ટીમેને ઓપનર રિપ્લેસ કરવાની આવી ત્યારે કેપ્ટન હરમનપ્રીતે એ છોકરીને યાદ કરી. જે ટીમમાં જ નહોતી, એ ટીમમાં જોડાઈ. એ જ છોકરી વર્લ્ડકપની ફાઇનલ મેચમાં સૌથી વધુ ૮૭ રન બનાવવા સાથે ટીમને વિકેટ જોઈતી હતી ત્યારે બોલિંગમાં બે મહત્ત્વની વિકેટ ઝડપી આપીને ‘પ્લેયર ઑફ ધ મેચ' બની.