સાંપ્રત

૨૦૨૫-’૨૬માં ભારત બનશે વિશ્વનું ત્રીજા નંબરનું અર્થતંત્ર

- વિનોદ પંડ્યા

ઈસવીની પ્રથમ સદીથી માંડીને દસમી સદી સુધી દુનિયાની ગ્રોસ ડોમેસ્ટિક પ્રોડક્ટ્સ (જીડીપી) અર્થાત્ કુલ આવકનો ચાલીસ ટકા હિસ્સો ભારતમાંથી મળતો હતો. ત્યાર બાદ તે પચ્ચીસ ટકાની આસપાસ રહેવા લાગ્યો. એ સમૃદ્ધિના કારણે જ દુનિયાની લગભગ તમામ પ્રકારની પ્રજાઓએ ભારત પર આક્રમણ કર્યું.

સિકંદરને છેક મેસેડોનિયાથી ભારત આવવાની ઝંખના થઈ. અંગ્રેજો આવ્યા અને માલસામાન ઇંગ્લેન્ડ લઈ જવા માંડ્યા. બાદમાં જીડીપીની ગણતરી કોણ કરે? છતાં અઢારમી સદીના અંત સુધી જીડીપીનું પ્રમાણ નોંધપાત્ર હતું. આઝાદી મળી અને ૧૯૮૦માં ભારતના અર્થતંત્રનું કદ માત્ર ૧૮૬ અબજ તેંત્રીસ કરોડ ડૉલરનું હતું.

ભારતની માઠાદીઠ સરેરાશ વાર્ષિક આવક ૫૨૬ ડૉલરની હતી. વરસ ૧૯૪૭થી માંડીને ૧૯૯૧ સુધીના, મુખ્યત્વે કોંગ્રેસ શાસનમાં, દુનિયામાં જીડીપી (નોમિનલ)ના ધોરણે દેશનો ક્રમ ૧૩૬મો હતો. આજે ૩૫ વરસ બાદ ભારત છલાંગો ભરતું ચોથા ક્રમે પહોંચી ગયું છે અને આ અનન્ય સિદ્ધિથી દેશ આખો ખુશખુશાલ છે અને ત્રીજા ક્રમે જઈ બેસવા માટે કમર કસી રહ્યો છે. આજે જે ગતિથી અર્થતંત્ર આગળ વધી રહ્યું છે તે જોતા લાગે છે કે ત્રીજા ક્રમે પણ જરૂર પહોંચશે.