സ്വർണവില ഇനി എങ്ങോട്ട്?

കാര്യമായ ഇടിവുണ്ടാകുമ്പോൾ കേന്ദ്ര ബാങ്കുകൾ കൂടുതൽ സ്വർണം സംഭരിക്കാൻ രംഗത്തെത്തുമെന്നതിനാൽ കുത്തനെയുള്ള ഇടിവ് മിക്കവാറും അസംഭവ്യമാണ്.

- ഡോ വി.കെ.വിജയകുമാർ ചീഫ് ഇൻവെസ്റ്റ്മെന്റ് സ്ട്രാറ്റജിസ്റ്റ്, ജിയോജിത് ഫിനാൻഷ്യൽ സർവീസസ്

കഴിഞ്ഞ മൂന്നു വർഷ കാലയളവിൽ സ്വർണ വിലയിലുണ്ടായ കുതിപ്പ് ആശ്ചര്യജനകമായിരുന്നു. ഇത് നിക്ഷേപ ആസ്തി എന്ന നിലയിൽ സ്വർണത്തിന്റെ പ്രസക്തി ഏറെ വർധിപ്പിച്ചു. ഒപ്പം കുറെ ചോദ്യങ്ങളും ജനമനസ്സുകളിൽ ഉയരുന്നുണ്ട്.

സ്വർണവില ഇങ്ങനെ കുതിക്കാനിടയായതെന്തു കൊണ്ട്? സ്വർണത്തിന്റെ ഈ തിളക്കം തുടരുമോ? അതോ ഈ നിലയിൽ തന്നെ കുറച്ചു കാലം നിൽക്കുമോ? മുൻപ് ചില അവസരങ്ങളിൽ സംഭവിച്ചതുപോലെ സ്വർണത്തിന് ഒരു വിലത്തകർച്ച ഉണ്ടാകുമോ?

10 വർഷം 2.465ൽനിന്ന് 10,100 രൂപയിലേക്ക്

2015 സെപ്തംബറിൽ, സ്വർണത്തിന്റെ വില ട്രോയ് ഔൺസിന് 1,115 ഡോളർ ആയിരുന്നത് 2025 സെപ്തംബർ ആയപ്പോൾ 3,670 ഡോളറോളമായി ഉയർന്നു. അതേ സമയം ഇതേ കാലയളവിൽ ഇന്ത്യൻ രൂപയിൽ സ്വർണവിലയുടെ കുതിപ്പ് ഇതിലും ഏറെ വലുതായിരുന്നു. ഗ്രാമിന് 2,465 രൂപയിൽനിന്ന് 10,100 രൂപയായാണ് ഉയർന്നത്. ഡോളറിലും രൂപയിലുമുള്ള വിലകളിൽ ഇത്ര വ്യത്യാസം വരാനുള്ള പ്രധാന കാരണം ഇക്കാലയളവിൽ രൂപയ്ക്കുണ്ടായ മൂല്യത്തകർച്ചയാണ്.

വില കൂടാനുള്ള കാരണങ്ങൾ

കാര്യങ്ങൾ ശരിയായി മനസ്സിലാക്കാൻ, നാം ആദ്യം അറിയേണ്ടത് സ്വർണവില നിർണയിക്കുന്ന ഘടകങ്ങൾ ഏതൊക്കെയാണ് എന്നാണ്?