ചികിത്സാച്ചെലവ് കുതിക്കുന്നു പണം ഉറപ്പാക്കാൻ മാർഗങ്ങൾ പലത്

കേരളത്തിലെ 42.5 ലക്ഷം കുടുംബങ്ങൾക്കും (വരുമാന പരിധി ബാധകമല്ല) വർഷം 5 ലക്ഷം രൂപയുടെ ചികിത്സ സൗജന്യം

- 

കടക്കെണിയിലാകുന്ന കുടുംബങ്ങളോട് അന്വേഷിച്ചാൽ, അപ്രതീക്ഷിതമായുണ്ടായ ചികിത്സാ ച്ചെലവാണ് നല്ലൊരു ശതമാനത്തെയും പ്രതിസന്ധിയിലാക്കിയത് എന്നു കാണാം. രോഗങ്ങളും അപകടങ്ങളും ഓരോ ദിവസവും കൂടിക്കൂടിവരുന്നു. മറുവശത്ത് ആശുപ്രതിച്ചെലവ് റോക്കറ്റുപോലെ കുതിക്കുന്നു. അതുകൊണ്ടുതന്നെ പണം കണ്ടെത്താൻ ഏവരും ബുദ്ധിമുട്ടുന്നു.

പാവപ്പെട്ടവനെന്നോ പണക്കാരനെന്നോ, വ്യത്യാസമില്ലാതെ നെട്ടോട്ടമോടുന്നു. ഈ സാഹചര്യത്തിൽ ചികിത്സാച്ചെലവുകൾക്ക് പണം ഉറപ്പാക്കാനായി വിവിധ വരുമാന വിഭാഗങ്ങൾക്കു മുന്നിൽ ലഭ്യമായ അവസരങ്ങളെക്കുറിച്ചു നിർബന്ധമായും അറിഞ്ഞുവയ്ക്കണം.

ആയുഷ്മാൻ ഭാരത്, ഇഎസ്ഐ, കാരുണ്യ, മെഡിസെപ്, സെൻട്രൽ ഗവൺമെന്റ് ഹെൽത്ത് സ്കീം തുടങ്ങി കേന്ദ്ര-സംസ്ഥാന സർക്കാരുകളുടെ പദ്ധതികളെല്ലാം കൂടി ചേരുമ്പോൾ രാജ്യത്തെ വലിയൊരു വിഭാഗത്തിനും പ്രത്യേകിച്ച് സാധാരണക്കാർക്ക് ചികിത്സയ്ക്കുള്ള കവറേജ് സംവിധാനങ്ങൾ ഉണ്ട് എന്നത് യാഥാർഥ്യമാണ്. കൂടാതെ ഇൻഷുറൻസ് കമ്പനികളിൽനിന്ന് പണം മുടക്കി വാങ്ങാവുന്ന ഹെൽത്ത് പോളിസികൾ വഴി താങ്ങാവുന്ന പ്രീമിയത്തിൽ ചെലവുകൾക്കുള്ള പണം കണ്ടെത്താനും കഴിയും.

കേന്ദ്ര-സംസ്ഥാന ജീവനക്കാർക്കും പെൻഷൻകാർക്കുമുള്ള ഇൻഷുറൻസ് പദ്ധതിയുടെ വിശദാംശങ്ങൾ അർഹരായവർക്കു കൃത്യമായി അറിയാം. അവർ അതു ശരിയായി ഉപയോഗപ്പെടുത്തുന്നുമുണ്ട്. എന്നാൽ സാമൂഹിക ക്ഷേമപദ്ധതികളുടെ ഭാഗമായുള്ള ഇൻഷുറൻസ് കവറേജുകളെക്കുറിച്ച് അതിന്റെ ഗുണഭോക്താക്കളായ സാധാരണക്കാർക്ക് കൃത്യമായ ധാരണ ഇല്ലെന്നതാണ് വസ്തുത. പ്രത്യേകിച്ച്, സമൂഹത്തിന്റെ താഴെ തട്ടിലുള്ളവർക്ക്. സർക്കാർ പദ്ധതികളെക്കുറിച്ച് അറിയാതെ ചികിത്സയ്ക്ക് പണം കണ്ടെത്താൻ ഏറെ ബുദ്ധിമുട്ടുന്നവരുമുണ്ട്.

ലഭ്യമായ പദ്ധതികളിൽ നിങ്ങൾക്ക് അർഹതയുള്ളതും അനുയോജ്യവുമായ പദ്ധതി കണ്ടെത്തുകയും അവ എങ്ങനെ ഉപയോഗപ്പെടുത്താം എന്നു മനസ്സിലാക്കി വയ്ക്കുകയുമാണ് ഓരോരുത്തരും ചെയ്യേണ്ടത്. അങ്ങനെയെങ്കിൽ അവശ്യസമയത്ത് നെട്ടോട്ടമോടാതെ സുഗമമായി ചികിത്സ ഉറപ്പാക്കാം. അതിനു സഹായകമായ വിവരങ്ങളും നിർദേശങ്ങളുമാണ് ഇത്തവണ കവർ സ്റ്റോറിയിൽ.

42.5 ലക്ഷം കുടുംബങ്ങൾക്ക് 5 ലക്ഷം രൂപവരെയുള്ള ചികിത്സയ്ക്ക് പണം നൽകേണ്ട