അദാനി Boys ഓഹരി വിപണിയിൽ ഇനി ഹിറ്റ് അടിക്കുമോ?

ഓഹരി വിപണിയിലെ അദാനി ബോയ്സ് ഗൗതം അദാനി ഗ്രൂപ്പിലെ ലിസ്റ്റഡ് കമ്പനികൾ 10 ആണ്. പതാക വാഹക കമ്പനിയായ അദാനി എന്റർപ്രൈസസിനു പുറമെ അദാനി പോർട്ട്, അദാനി ഗ്രീൻ എനർജി, അദാനി ടോട്ടൽ ഗ്യാസ്, അദാനി എനർജി സൊല്യൂഷൻസ്, അദാനി പവർ, അദാനി വിൽമർ, അംബുജ സിമന്റ്സ്, എസിസി, എൻഡി ടിവി എന്നിവയും ഇന്ത്യൻ വിപണിയിലെ നിർണായക സാന്നിധ്യമാണ്.

- സനിൽ ഏബ്രഹാം ഡയറക്ടർ ഷെയർവെൽത്ത് വെൽത്ത് മാനേജ്മെന്റ് ലിമിറ്റഡ്

ഇന്ത്യൻ വിപണിയിൽ ഉയരങ്ങളിലേക്കു പറക്കുകയായിരുന്നു ഗൗതം അദാനിയുടെ കമ്പനികൾ. വളർച്ചാ സാധ്യതയുള്ള മേഖലകളിലെല്ലാം വൻ വികസനപദ്ധതികൾ, കോടിക്കണക്കിനു രൂപയുടെ പുതിയ നിക്ഷേപങ്ങൾ, കേന്ദ്ര സർക്കാരിന്റെ അകമഴിഞ്ഞ പിന്തുണ... എല്ലാം ഒത്തുചേർന്നപ്പോൾ അദാനി ഓഹരികൾ ഓരോന്നും നിക്ഷേപകർക്കും മികച്ച നേട്ടം നൽകി.

എന്നാൽ അമേരിക്കയിൽ ഇരുന്ന് ഹിൻഡൻബർഗ് എന്ന ഷോർട്ട് സെല്ലർ കുഴിച്ച വൻഗർത്തത്തിലേക്ക് 2023 ജനുവരിയിൽ തികച്ചും അപ്രതീക്ഷിതമായി അദാനി ബോയ്സ് വീണു. അതോടെ കാര്യങ്ങളൊന്നാകെ തകിടംമറിഞ്ഞു. ലോകസമ്പന്ന പട്ടികയിൽ ഗൗതം അദാനി താഴേയ്ക്കു പതിച്ചു. ഗ്രൂപ്പിലെ പത്ത് ഓഹരികളും തകർന്നടിഞ്ഞു. ഏതാനും ദിവസങ്ങൾകൊണ്ട് നിക്ഷേപകരുടെ കോടിക്കണക്കിനു രൂപയുടെ സമ്പത്ത് ഒഴുകിപ്പോയി.

അത് ഇന്ത്യൻ വിപണിയെ ആകെ പിടിച്ചുലച്ചു. സാധാരണക്കാരായ ഓഹരി നിക്ഷേപകരെ ഇത്രമേൽ നിരാശപ്പെടുത്തിയ സംഭവം സമീപകാലത്തൊന്നും ഇന്ത്യൻ വിപണിയിൽ സംഭവിച്ചിട്ടില്ല. അദാനി ബോയ്സിന് ഇനിയൊരു തിരിച്ചുവരവു സാധ്യമല്ലെന്നു പലരും വിലയിരുത്തി. നിക്ഷേപകരും സാമ്പത്തിക വിദഗ്ധരും ലോകം തന്നെയും അതേറ്റു പറഞ്ഞു.

എന്നാൽ വ്യത്യസ്തമായ തന്ത്രങ്ങളിലൂടെ ബിസിനസ് വളർച്ച ഉറപ്പാക്കുന്ന ഗൗതം അദാനി രക്ഷാപ്രവർത്തനങ്ങൾ നടത്തി. അദാനി ബോയ്സ് കുഴിയിൽ നിന്നും കരകയറാൻ ശ്രമം ആരംഭിച്ചു. ഓഹരി വിപണി റെഗുലേറ്ററായ സെബിയും ഏറ്റവും ഒടുവിൽ സുപ്രീം കോടതിയും പിന്തുണച്ചോടെ അഗാധ ഗർത്തത്തിൽനിന്നും ഗ്രൂപ്പ് കമ്പനികൾ കരകയറുക തന്നെ ചെയ്തു.

കാര്യങ്ങൾ പഴയ നിലയിലേക്കു തിരിച്ചുവരികയാണ്. എന്നാൽ അവിടെയും ഇവിടെയും ചില പ്രശ്നങ്ങൾ തലപൊക്കുന്നുണ്ട്. ഇവയേയും അദാനി ബോയ്സ് മറികടക്കുമോ? വീണ്ടും ഓഹരികൾ പുതിയ റെക്കോർഡുകൾ കയ്യെത്തിപിടിക്കുമോ? രാജ്യമെമ്പാടുമുള്ള നിക്ഷേപകരും ഇന്ത്യയിലെ ബിസിനസുകാരും ചോദിക്കുന്നു.

ഗുണകേവിൽ വീണ സുഹൃത്തിനെ രക്ഷിച്ച മഞ്ഞുമ്മൽ ബോയ്സിന്റെ കഥ പറയുന്ന മലയാള സിനിമ റെക്കോർഡ് തിരുത്തി മുന്നേറുന്ന പശ്ചാത്തലത്തിൽ അദാനി ബോയ്സിന്റെ വീഴ്ചയും തിരിച്ചുവരവും ആണ് ഇത്തവണ കവർ സ്റ്റോറിയിൽ.

അദാനി ബോയ്സ് 'ഹിൻഡൻബർഗ് കേവിലേക്ക്