ഡിജിറ്റൽ ലോകത്തു സുരക്ഷ ഉറപ്പാക്കാം

 അൽപം പക്വതയോടെയും ശ്രദ്ധയോടെയും പെരുമാറിയാൽ ഡിജിറ്റൽ പണമിടപാടുകൾ സുരക്ഷിതമാക്കാം എന്നാണു ബാങ്കിങ് രംഗത്തുള്ളവർ പറയുന്നത്. അതിനു സ്വീകരിക്കാവുന്ന ചില വഴികൾ.

- 

ഡിജിറ്റൽ സുരക്ഷയിൽ നമ്മുടെ റോൾ നിർണായകമാണ്. കാരണം, നമ്മുടെ വിവരങ്ങൾ നാം അറിയാതെ കൈവശപ്പെടുത്തിയാണു മിക്ക തട്ടിപ്പുകളും നടത്തുന്നത്. ആ വിവരങ്ങൾ നമ്മിൽനിന്നു ചോരില്ല എന്നുറപ്പിക്കയാണ് ആദ്യം വേണ്ടത്.

കെവൈസി അപ്ഡേറ്റ് ചെയ്യാനുള്ള മെസേജ്, ഫോൺകോൾ, ബ്ലോക്കായ അക്കൗണ്ട് അൺ ലോക് ചെയ്യാനുള്ള ലിങ്ക് തുടങ്ങി പലതരത്തിൽ പലരൂപത്തിൽ ഇത്തരം ശ്രമങ്ങൾ മുന്നിലെത്തും. അതിൽ വീണാൽ നിങ്ങൾ പെട്ടുപോകും. ഇത്തരം മെസേജോ കോളോ ലിങ്കോ ഒന്നും ബാങ്കിന്റെ ഭാഗത്തുനിന്നുണ്ടാകാറില്ല. പേരോ പാനോ ഒടിടിയോ അക്കൗണ്ട് വിവരങ്ങളോ ചതിയിൽ പെട്ടു നൽകില്ലെന്നുറപ്പിക്കുക. ലിങ്ക് ക്ലിക് ചെയ്യാതിരിക്കുക. ഇനി സംശയമുണ്ടെങ്കിൽ നേരിട്ടോ ഫോൺ മുഖേനയോ ബാങ്കിൽ അന്വേഷിക്കുക.

ഫോൺ സൂക്ഷിക്കുക ഇടപാടിനുപയോഗിക്കുന്ന ഫോൺ ശരിയായി സൂക്ഷിക്കുക. അതു മറ്റുള്ളവർക്കു കൊടുക്കാതിരിക്കുക. ചില ആപ്പുകൾ ഡൗൺലോഡ് ചെയ്താൽ മൊബൈലിൽ നടത്തുന്ന എല്ലാ കാര്യങ്ങളും മറ്റൊരാൾക്കു നിരീക്ഷിക്കാനാകും. അവ ഇൻസ്റ്റാൾ ചെയ്യരുത്. അത്യാവശ്യമുള്ള ആപ്പുകൾ മാത്രം കാര്യങ്ങൾ മനസ്സിലാക്കി ഇൻസ്റ്റാൾ ചെയ്യുക. ഫോൺ എപ്പോഴും ലോക് ചെയ്തു സൂക്ഷിക്കുക. മറ്റുള്ളവരുടെ ഫെയ്സ് റെക്കേഷൻ നിങ്ങളുടെ ഫോണിൽ അനുവദിക്കാതിരിക്കുക

 നെറ്റ് ബാങ്കിങ് സുരക്ഷിതം

നെറ്റ് ബാങ്കിങ്ങിൽ റജിസ്റ്റർ ചെയ്ത മൊബൈൽ നമ്പറും ഇ-മെയിൽ ഐഡിയും ആവശ്യമാണ്. ഇതിന്റെ പാസ്സ്‌വേർഡ് നൽകുന്നതും സുരക്ഷിതമായാണ്. യൂസർ ഐഡിയും പാസ്സ്‌വേർഡും കിട്ടി മറ്റൊരാൾ ലോഗിൻ ചെയ്താലും ഇടപാടു നടത്താൻ ട്രാൻസാക്ഷൻ പാസ്സ്‌വേർഡ് വേണം. ഇതിനെല്ലാം പുറമേ മൊബൈലിൽ വരുന്ന ഒടിപിയും നിർബന്ധമാണ്. ഇവയെല്ലാം ഡിജിറ്റൽ ബാങ്കിങ്ങിന്റെ സുരക്ഷ വർധിപ്പിക്കും.

പരിധി കുറച്ചു സുരക്ഷ കൂട്ടാം

 ഡിജിറ്റൽ ഇടപാടുകളിലെല്ലാം പരിധി നിശ്ചയിക്കാം. നിങ്ങളുടെ ശരാശരി ഇടപാട് 20,000 രൂപയുടേതാണെങ്കിൽ ഇടപാടിന്റെ ഉയർന്ന പരിധി 20,000 രൂപയാക്കുക. അക്കൗണ്ടിൽ ഒരാൾ നുഴഞ്ഞു കയറിയാലും അത്രയും തുകയേ നഷ്ടപ്പെടൂ. അതിൽ കൂടുതലുള്ള തുക വേണ്ടിവന്നാൽ തവണകളായി കൊടുക്കാം.