അപാർട്മെന്റിലെ വൈദ്യുത സുരക്ഷ എങ്ങനെ ഉറപ്പാക്കാം?

അപാർട്മെന്റുകളിൽ വൈദ്യുത ക്രമീകരണങ്ങളിൽ മാറ്റം വരുത്തുമ്പോൾ പല കാര്യങ്ങളും ശ്രദ്ധിക്കേണ്ടതുണ്ട്

- 

ഇലക്ട്രിക് സുരക്ഷയുടെ കാര്യത്തിൽ വീടുകളേക്കാൾ ഈ സുരക്ഷിതമാണ് അപാർട്മെന് പലപ്പോഴും. എന്നാൽ ഇത് പൂർണമായും ശരിയല്ല താനും. അപാർട്മെന്റുകൾ നിർമിക്കുന്നത് മിക്കപ്പോഴും പ്രശസ്തരായ ബിൽഡർമാർ ആയിരിക്കും. വിദഗ്ധരായ ജോലിക്കാരും ഗുണനിലവാരമുള്ള സാമഗ്രികളുമായിരിക്കും ഇവർ ഉപയോഗിക്കുന്നത്. എന്നാൽ പണി പൂർത്തിയായതിനു ശേഷം ഫ്ലാറ്റിന്റെ നടത്തിപ്പ് അസോസിയേഷനു കൈമാറും.

ജനറേറ്ററും മറ്റും പ്രവർത്തിപ്പിക്കാനായി കെയർ ടേക്കറെ അസോസിയേഷൻ ഏൽപ്പിക്കുന്നതാണ് പൊതുവേ കണ്ടു വരുന്നത്. ഈ മേഖലയിൽ പ്രത്യേകിച്ച് വൈദഗ്ധ്യം ഒന്നുമില്ലാത്ത ഇദ്ദേഹം തന്നെയാകും അപാർട്മെന്റിലെ ഇലക്ട്രിക് മെയിന്റനൻസ് ചെയ്യുന്നതും. ജനറേറ്റർ എഎംസി അഥവാ വാർഷിക മെയിന്റനൻസിനു കൊടുക്കുമെന്നല്ലാതെ ക്യത്യമായ ഇടവേളകളിൽ മെയിന്റനൻസ് ചെയ്തു കാണാറില്ല.

കെഎസ്ഇബി അനുമതി

എല്ലാ വലിയ അപാർട്മെന്റ് ഗ്രൂപ്പുകളിലും ട്രാൻസ്ഫോർമറിൽ നിന്നുള്ള ഒന്നിലേറെ പാനൽ ബോർഡുകൾ ഉണ്ടാകും. അതിൽ ഇലക്ട്രിക്കൽ ബൈ പാസിങ് നടക്കാതിരിക്കാൻ വേണ്ടി പാനൽ ബോർഡുകൾ കെഎസ്ഇബി സീൽ ചെയ്യും. മെയിന്റനൻസ് ചെയ്യുമ്പോൾ കെഎസ്ഇബിയുടെ അനുമതി നേടി ഈ സീൽ തുറന്നു തരേണ്ടതുണ്ട്. 90 ശതമാനം ഫ്ലാറ്റുകളിലും അതു കൊണ്ടുതന്നെ അങ്ങനെയൊരു കാര്യം നടക്കാറില്ല. സ്വന്തം അപാർട്മെന്റിലെ മെയിന്റനൻസ് ഓരോരുത്തരും ചെയ്യാറുണ്ടെങ്കിലും പൊതുവായ മെയിന്റനൻസ് വിരളമാണ്. ഇലക്ട്രിക് വാഹനങ്ങളുടെ ചാർജർ പോലെയുള്ളവ ഫ്ലാറ്റിന്റെ അതേ കണക്ഷനിൽ നിന്നു തന്നെ ലൈൻ വലിച്ചു കൊടുക്കുന്നതു പോലെയുള്ള അബദ്ധങ്ങൾ കാണാം. എന്നാൽ അപാർട്മെന്റിലെ വൈദ്യുത പുതുക്കലുകൾ നിയമപരമായി ഇലക്ട്രീഷ്യനെ കൊണ്ട് ചെയ്യാൻ പറ്റില്ല. കാരണം കേരളത്തിലെ നിയമമനുസരിച്ച് അപാർട്മെന്റിന്റെ മുഴുവൻ കണക്ടഡ് ലോഡ് വച്ച് എ ക്ലാസ് കോൺട്രാക്ടർ വേണം. ഡ്രോയിങ്ങിൽ മാറ്റങ്ങൾ വരുത്തിയതിനു ശേഷം വേണം ആവശ്യമുള്ള പരിഷ്കാരങ്ങൾ വരുത്താൻ.