The Vincents' trait

സിനിമ-സീരിയൽ റിയാലിറ്റിഷോ താരമായ റോൺസൻ വിൻസെന്റ് വീട് എന്ന തന്റെ പാഷനെക്കുറിച്ച്...

- ശ്രീദേവി

വെറും പാരമ്പര്യം അല്ല, അച്ഛനപ്പൂപ്പൻമാരിൽ അണുവിലേക്കും പകർന്നുകിട്ടിയ സമ്മാനം- അതാണ് റോൺസൻ വിൻസെന്റിന് കലയോടും വീടുകളോടുമുള്ള ഇഷ്ടം. റോൺസന്റെയും ഭാര്യ ഡോ. നീരജയുടെയും വീടിനോടുള്ള ഭ്രമം സോഷ്യൽ മീഡിയയിലൂടെ ആരാധകർക്ക് സുപരിചിതമാണ്. നിറങ്ങളോടും അകത്തളക്രമീകരണത്തോടും വളരെ വ്യത്യസ്തമായ സമീപനമാണ് റോൺസൻ നീരജ ദമ്പതിമാരുടേത്.

അച്ഛന്റെ വഴിക്ക്

മലയാള സിനിമാ ചരിത്രത്തിലെ മികച്ച ഛായാഗ്രാഹകരിൽ ഒരാളായ, ഭാർഗവീനിലയം പോലുള്ള ക്ലാസിക്കുകളുടെ സംവിധായകനായ എ. വിൻസെന്റ് മാസ്റ്ററുടെ അനുജൻ റോണി വിൻസെന്റിന്റെ മകന് കലയോടും വാസ്തു വിദ്യയോടും താൽപര്യമുണ്ടായില്ലെങ്കിലേ അദ്ഭുതമുള്ളൂ. “ കോഴിക്കോടാണ് ഞങ്ങളുടെ തറവാട്. ഒരു ആർക്കിടെക്ചറൽ സ്ഥാപനത്തിൽ ജോലി ചെയ്തിരുന്ന അച്ഛന്റെ ഹോബിയായിരുന്നു വീടു നിർമാണം. ഒരു സ്ഥലം വാങ്ങി ഇഷ്ടമുള്ള രീതിയിൽ വീട് വയ്ക്കും. ഒന്നോ രണ്ടോ വർഷത്തിനുള്ളിൽ അതു വിറ്റ്, പുതിയൊരു സ്ഥലം വാങ്ങി മറ്റൊരു വീടുവച്ച് അങ്ങോട്ടു മാറും. ഇങ്ങനെ ഏഴ് വീടുകളിൽ ഞങ്ങൾ താമസിച്ചിട്ടുണ്ട്. പ്രായമായപ്പോഴാണ് അച്ഛൻ ഒരിടത്ത് സ്ഥിര താമസമായത്.

വീടുകളോടുള്ള അച്ഛന്റെ അഭിനിവേശമാണ് എനിക്കു കിട്ടിയത്. ഒരു വ്യത്യാസം മാത്രം. ഞാൻ വീടുകൾ പണിതിടും; വിൽക്കാറില്ല. ഇതുവരെ രണ്ട് വീടുകൾ പൂർത്തിയാക്കി. മൂന്നാമത്തേതിന്റെ പണി നടന്നുകൊണ്ടിരിക്കുന്നു,'' റോൺസൻ സ്വന്തം വീടനുഭവങ്ങളിലേക്ക് കടന്നു. വീട് വയ്ക്കലിൽ അച്ഛനെ തോൽപ്പിക്കുമോ എന്നു ചോദിച്ചാൽ, ഇക്കാര്യത്തിൽ “കോംപറ്റീഷൻ' ഇല്ല എന്ന് റോൺസൻ പറയും. റോൺസൻ പണിയുന്ന വീടുകളുടെയെല്ലാം പ്ലാൻ വരയ്ക്കുന്നതും മേൽനോട്ടം വഹിക്കുന്നതും അച്ഛൻ തന്നെയാണ്.