ജോർജ് തോമസ് സാറും സർഗവേദിയും

വഴിവിളക്കുകൾ

-  കെ.വി. മോഹൻകുമാർ

ആലപ്പുഴ പട്ടണത്തിലാണ് ഞാൻ ജനിച്ചതും എട്ടുവയസ്സുവരെ വളർന്നതും. എന്റെ എട്ടാംവയസ്സിൽ അച്ഛൻ മരിച്ചതോടെ ഞങ്ങളുടെ കുടുംബം അമ്മയുടെ നാടായ ചേർത്തലയിലേക്കു വന്നു. അച്ഛൻ ആലപ്പുഴ പട്ടണത്തിൽ ആധാരം എഴുത്ത് ഓഫിസ് നടത്തുകയായിരുന്നു.

കുറച്ചു കാലം സ്കൂൾ അധ്യാപകനുമായിരുന്ന അച്ഛൻ അഗസ്റ്റിൻ ജോസഫിന്റെയും കുഞ്ഞുകുഞ്ഞ് ഭാഗവതരുടെയുമൊക്കെ നാടകങ്ങളിൽ സ്ത്രീവേഷം കെട്ടിയിരുന്നു. അച്ഛന്റെ മരണശേഷമുള്ള ജീവിത്പ്രയാസങ്ങൾക്കിടയിൽ വായനയായിരുന്നു എനിക്കു കൂട്ട്. വായനയാണ് എന്നെക്കൊണ്ട് പത്താമത്തെ വയസ്സിൽ "വിശപ്പ് എന്ന ആദ്യ കഥ എഴുതിപ്പിക്കുന്നത്. ഞാൻ എട്ടാം ക്ലാസിൽ പഠിക്കുമ്പോഴാണ് ആദ്യമായി എന്റെ കഥ ബാലയുഗം എന്ന കുട്ടികളുടെ മാസികയിൽ അച്ചടിച്ചു വരുന്നത്.

ചേർത്തല സെന്റ് മൈക്കിൾസ് കോളജിലെ പ്രീഡിഗ്രിക്കാലത്ത് ഞങ്ങളെ മലയാളം പഠിപ്പിച്ചിരുന്നത് കവി ജോർജ് തോമസ് സാർ ആയിരുന്നു. സാറാണ് എന്നെ ഒരെഴുത്തുകാരനായി രൂപപ്പെടുത്തിയത്. അദ്ദേഹം എനിക്ക് സക്കറിയയുടെ "കുന്ന്' എന്ന കഥാസമാഹാരം തന്നിട്ട് താൻ ഇതുപോലെയുള്ള പുസ്തകങ്ങൾ വായിക്കണം, എങ്കിലേ കഥയെഴുത്ത് നന്നാവൂ എന്നു പറഞ്ഞു.