ஒரே நாடு...ஒரே தேர்தல்...ப்ளஸ் & மைனஸ்!

‘ஒரே நாடு ஒரே தேர்தல் என்பது சாத்தியமா?’ இப்போது நாடு முழுவதும் விவாதப் பொருளாகி இருக்கும் ஒரே கேள்வி இதுதான். காரணம், சமீபத்தில், ‘ஒரே நாடு, ஒரே தேர்தல்’ குறித்து ஆராய முன்னாள் குடியரசுத் தலைவர் ராம்நாத் கோவிந்த் தலைமையில் உயர்மட்டக்குழுவை அமைத்தது ஒன்றிய அரசு.

- பேராச்சி கண்ணன்

இந்நிலையில், அடுத்த ஆண்டு பொதுத்தேர்தல் நடைபெற இருப்பதால் நாடாளுமன்றத்திற்கும், மாநில சட்டமன்றங்களுக்கும் ஒரே நேரத்தில் தேர்தல் என்பது தொடர்பான விவாதங்கள் இப்போது சூட்டைக் கிளப்பியிருக்கின்றன.

இப்படி ஓர் உயர்மட்டக்குழுவை ஒன்றிய அரசு அறிவித்ததுமே எதிர்க்கட்சிகள் ஒட்டுமொத்தமாகத் தங்கள் எதிர்ப்பைத் தெரிவித்தன. இந்நிலையில் இதிலுள்ள சாதக, பாதகங்களை பல்துறைகளைச் சேர்ந்த அறிஞர்களும் நிபுணர்களும் பேசியும் எழுதியும் தங்கள் கருத்தை ஊடகங்கள் வாயிலாக பதிவு செய்து வருகின்றனர்.  

இந்தியா சுதந்திரம் அடைந்தபிறகு முதல் மக்களவைத் தேர்தல் 1952ம் ஆண்டு நடந்தது. அப்போது மக்களவைக்கு மட்டுமல்ல. இந்தியா முழுவதும் உள்ள அனைத்து மாநில சட்டமன்றங்களுக்கும் ஒன்றுபோல் தேர்தல்கள் நடந்தன. அதாவது, ஒரு நாடு ஒரே தேர்தலைச் சந்தித்தது. இது 1967ம் ஆண்டு வரை தொடர்ந்தது.

ஆனால், சில சட்டமன்றங்களின் ஆட்சிக்கலைப்பு உள்ளிட்ட விஷயங்களால் இந்த முறை மாறிப்போனது. 1959ம் ஆண்டு கேரளாவில் இ.எம்.எஸ்.நம்பூதிரிபாட் தலைமையிலான கம்யூனிஸ்ட் கட்சியின் ஆட்சியைக் கலைத்தது அப்போதைய ஒன்றிய அரசு.

பின்னர் 1968 மற்றும் 1969ல் சில மாநில சட்டமன்றங்கள் கலைக்கப்பட்டன.  மக்களவையும் 1970ல் கலைக்கப்பட்டு, முன்கூட்டியே தேர்தல் நடத்தப்பட ‘ஒரே நாடு ஒரே தேர்தல்’ என்ற சுழற்சி வட்டம் உடைந்துபோனது.

இதன்பிறகு, இந்திய தேர்தல் ஆணையம் 1983ம் ஆண்டு மக்களவைக்கும், மாநில சட்டமன்றங்களுக்கும் ஒரே நேரத்தில் தேர்தல் நடத்தும்படியான அமைப்பை உருவாக்க வேண்டும் எனப் பரிந்துரைத்தது. இதனையடுத்து பதினாறு ஆண்டுகளுக்குப் பின்னர் 1999ல் பி.பி.ஜீவன் ரெட்டி தலைமையிலான இந்திய சட்ட ஆணையம் ஒரே தேர்தல் என்பதை பரிந்துரைத்தது.

பிறகு, மீண்டும் பதினாறு ஆண்டுகள் கழித்து 2015ல் நாடாளுமன்ற நிலைக்குழு, ஒரே தேர்தல் பரிந்துரையை வலியுறுத்தியது. தொடர்ந்து 2018ம் ஆண்டு ஆகஸ்ட் 30ம் தேதி, நீதிபதி சவுகான் தலைமையிலான இந்திய சட்ட ஆணையம் ஒரே நேரத்தில் தேர்தல் குறித்த வரைவு அறிக்கையை வெளியிட்டது.