மண்ணுக்கு போகற கட்டை...

கனரக வாகனங்களும் கார்களும் இரு சக்கர வாகனங்களில் குறைந்தபட்சம் மூன்றுபேருடன் விரைந்து பயணித்துக் கொண்டிருக்கும் பரபரப்பான பல்லடம் மங்கலம் சாலையில் ஓரமாக ஒருவர் அமர்ந்து கொண்டு எதிர்திசையில் வருவோரிடம் கையேந்தி யாசகம் கேட்பார்.

- சந்திரகிருஷ்ணன்

அவர் உட்கார்ந்திருக்கும் தோரணையே அலாதியானது. அதிகாரத் தோரணை என்றே சொல்லலாம். கால்மேல் கால்போட்டு தரையில் நேராக நிமிர்ந்து அமர்ந்திருப்பது கொஞ்சம் வித்தியாசமாகவே இருக்கும். வள்ளுவரின் அமர்ந்திருக்கும் தோற்றத்தில் வடிவமைக்கப்பட்ட சிலை ஒன்றையும் ஓவியத்தையும் நினைவுபடுத்தும். கெட்டி தட்டிப்போன தலைமுடிக் கற்றை. கற்றை என்று சொல்வதைவிட கட்டை என்பது பொருத்தம். அழுக்கு காரணமாக மண்ணின் நிறத்தில் தலையில் சடாமுடி. நான்கு சக்கர வாகனங்களின் மெக்கானிக் வேலை செய்யும் போது அணிந்திருக்கும் கிரீஸ் பிசுக்குடனான சட்டையும் பழுப்பு நிறத்திலான வேட்டியும். சட்டை நல்ல நிறத்தில் இருந்திருக்கலாம். வேட்டி வெள்ளையாகவோ காவி நிறத்திலோ இருந்திருக்கலாம். ஆனால் ஒரிஜினல் வண்ணம் தெரியாத அளவிற்கு அடர் காக்கி நிறம் கருமை கலந்த வண்ணத்தில் அவரது உடை இருந்தது. கைவிரல்களின் நகங்கள் தாறுமாறாக வளர்ந்து அழுக்குப் படிந்து கருமையான தோற்றம். குளித்தல் என்பது அவருக்குத் தொடர்பில்லாத, தெரியாத ஒன்றாக இருக்கலாம். பேசும்போதோ அல்லது இலேசாகச் சிரிக்கும்போதோ தெரியும் பழுப்பு நிறத்திலான பல்வரிசை. மொத்தத்தில் அழுக்குச் சாமியார் போன்ற தோற்றம். கணக்கன்பட்டி அழுக்குமூட்டைச் சாமியாரை நினைவுபடுத்தும் சாயல்.