Wild&Jag; / Game&Hunt; - Februarie 2016

Bu sayıda

2015-oorsig en 2016-vooruitsigte

Wildproduksie
Die R2.2 miljard-omset op wildveilings behaal in 2015 is 17% hoër as in 2014, maar verteenwoordig ’n massale 114%-verhoging sedert 2013. ’n Totaal van 114 veilings is aangebied, wat 37% meer as in 2014 is. 40 079 diere is verhandel teenoor 28 733 die vorige jaar, wat ’n pryseffek moes hê soos aangetoon deur ’n redelik algemene daling in pryse. Dit is in teenstelling met 2014 toe pryse, ten spyte van ’n verhoogde aanbod, oor die algemeen gestyg het.

Goeie genetika het weer eens getoon wat die mark gesoek het.

Die vraag is, wat gaan 2016 oplewer? Volgens dr Flippie Cloete, die samesteller van die verslag oor die lewendewild-handel in 2016, kan die wisselkoers in 2016 ’n positiewe uitwerking hê, wat deur die effek van die droogte teengewerk kan word. Ernst Janovsky, landbou-ekonoom van Absa (WILD & JAG, Januarie 2016), verwag dat verdere uitbreiding in wildproduksie in 2016 verwag kan word, veral wat betref skaarswild soos buffels en swartwitpense. Hy beklemtoon ook die belangrikheid van genetika en verwag dat meer teelplase gevestig kan word, wat ook vorentoe ’n aanbod- of pryseffek kan hê.

Jag
Volgens Janovsky bly jag die ruggraat van die wildbedryf in Suid-Afrika en sal dit verder uitbrei namate wildgetalle en -bestemmings toeneem. Internasionaal is daar ’n daling in wildgetalle.

Dit wil voorkom asof die uitbreiding in die wildbedryf in die afsienbare toekoms ’n gegewe is, wat jagters en wildboere tot voordeel sal strek.