കോവിഡ് കാലം കുട്ടികളെ ബാധിച്ചതെങ്ങനെ?

കോവിഡ് 19 കാലത്ത് ശൈശവം പിന്നിട്ട കുട്ടികൾ നേരിടുന്ന വളർച്ചാ പ്രശ്നങ്ങൾ ലക്ഷണങ്ങളിലൂടെ മനസ്സിലാക്കാം, പരിഹരിക്കാം

- ഡോ. സെറീന മോഹൻ വർഗീസ് സീനിയർ കൺസൽറ്റന്റ് പീഡിയാട്രിക്സ് രാജഗിരി ഹോസ്പിറ്റൽ, കൊച്ചി

കോവിഡ് കാലം കഴിഞ്ഞെങ്കിലും അതു നൽകിയ ആഘാതം അനുഭവിക്കുന്നവരാണു പലരും. ചെറുപ്പക്കാരിൽ ഹൃദയാഘാതം, വിട്ടു മാറാത്ത ചുമ, ശ്വാസതടസ്സം, പ്രതിരോധശേഷിക്കുറവ് അങ്ങനെ മുതിർന്നവരെ ബാധിച്ച പ്രശ്നങ്ങൾ നിരവധി. അക്കൂട്ടത്തിൽ ഏറെ ശ്രദ്ധിക്കപ്പെടാതെ പോയ ഒന്നാണു കുഞ്ഞുങ്ങളുടെ വളർച്ചയിൽ കോവിഡ് വരുത്തിയ ബുദ്ധിമുട്ടുകൾ.

സാമൂഹിക ഇടപെടലുകൾ കുറവായതിനാൽ കോവിഡ് കാലത്തു ജനിച്ച കുഞ്ഞുങ്ങൾ അഥവാ പാൻഡെമിക് ബേബീസ് ചില പ്രത്യേക വെല്ലുവിളികൾ നേരിടുന്നുണ്ട്. കോവിഡ് 19 കാലത്തു ശൈശവം പിന്നിട്ട എല്ലാ കുഞ്ഞുങ്ങൾക്കും ഈ ബുദ്ധിമുട്ടുകളില്ലെങ്കിലും ചെറിയ തോതിലെങ്കിലും പ്രശ്നം തോന്നിയാൽ ഡോക്ടറുടെ സേവനം തേടാൻ വൈകരുത്.

ഭാഷാശേഷിയിലെ പരിമിതികൾ

കോവിഡ് കാലത്ത് ആളുകളുമായി നേരിട്ടുള്ള ഇടപെടലുകൾ കുറഞ്ഞതു കുട്ടികളെ ബാധിച്ചിട്ടുണ്ട്. കോവിഡിനെ നേരിടാൻ മാസ്ക് അത്യാവശ്യമായിരുന്നു. അതുകൊണ്ടു ചുണ്ടുകളുടെ ചലനം കൂടുതലായി കാണാൻ കഴിയാതിരുന്നതു പല കുട്ടികളുടെയും ഭാഷാ വികാസശേഷിയെ ബാധിച്ചിട്ടുണ്ട്. അതിഥികൾ, കൂട്ടുകാർ, പ്രേഗ്രൂപ്പുകൾ എന്നിവയുടെ അഭാവവും ഉണ്ടായിരുന്നല്ലോ. ഈ കാലഘട്ടത്തിൽ പിറന്ന പല കുട്ടികളും സംസാരിച്ചു തുടങ്ങാൻ വൈകിയതിനു ഇതു കാരണമായി.

ലക്ഷണങ്ങൾ ശ്രദ്ധിക്കാം

കുറച്ചു വാക്കുകൾ മാത്രം കുട്ടി ഉപയോഗിക്കുന്ന രീതി.

കണ്ണിലേക്കു നോക്കി സംസാരിക്കാതിരിക്കുക.

അമ്മയേയോ അച്ഛനേയോ അമിത ആശ്രയിക്കുന്നു.

ഒപ്പമുള്ള കുടുംബാംഗങ്ങളോട് അല്ലാതെ മറ്റുള്ളവരുമായി ഇടപഴകാൻ മടിയും പേടിയും. ഇത്തരം ലക്ഷണങ്ങളുണ്ടെങ്കിൽ കുട്ടിയുടെ സാമൂഹിക ഇടപെടൽ ശേഷി വളർത്താൻ കൂടുതൽ ശ്രദ്ധ നൽകണം.

പരിഹാര മാർഗങ്ങൾ

കുട്ടിയോടു കൂടുതൽ സംസാരിക്കുക.

ചെയ്യുന്ന കാര്യങ്ങൾ പൂർണ വാക്യങ്ങളാക്കി പറഞ്ഞു കൊണ്ട് ചെയ്യുക. ആഹാരം കഴിക്കാൻ വരൂ എന്നു പറ ഞ്ഞു തന്നെ വിളിക്കണം.

ആഹാരത്തിനു മുന്നിലെത്തിയാൽ എന്തൊക്കെയാണ് വിഭവങ്ങൾ എന്നു പറയുകയും പറയിപ്പിക്കുകയും ചെയ്യാം.

നിന്റെ ചുവന്ന കളിപ്പാട്ടം എവിടെ എന്ന മട്ടിൽ എപ്പോഴും ചോദ്യങ്ങൾ ചോദിക്കുകയും കുട്ടിയുടെ മറുപടി കേൾക്കാൻ സമയം നൽകുകയും ചെയ്യുക.