Oh My ഫ്രണ്ടേ...

സൗഹൃദമായാലും മറ്റേതൊരു ബന്ധമായാലും രണ്ടുപേർക്കിടയിലെ പേഴ്സണൽ സ്പേസ്.. അത് ആവശ്യമാണ് - ശ്രുതി രജനികാന്ത് 

- ബിന്ദു പി പി 

സൗഹൃദമിതെന്നുമിത് സുന്ദരകിസ്. രണ്ടുമനം തമ്മിലിഴചേർന്നൊരു പീസ്. അതേ. സൗഹൃദത്തോളം മനോഹരമായി മറ്റെന്തുണ്ട്. പാൽതു ജാൻവർ എന്ന സിനിമയിലൂടെ ശ്രദ്ധേയമായ ഡോ. ആതിര ഹരികുമാറും ചക്കപ്പഴം എന്ന ജനപ്രിയ പരമ്പരയുടെ മുഖമായ ശ്രുതി രജനികാന്തും തമ്മിലുള്ള സൗഹൃദത്തിന് വർഷങ്ങളുടെ പഴക്കമുണ്ട്. തങ്ങളുടെ സൗഹൃദ വിശേഷങ്ങളെക്കുറിച്ച് ആതിരയും ശ്രുതിയും സംസാരിച്ചുതുടങ്ങി.

ആതിര: മൂന്ന് വയസ്സ് മുതൽ ചിക്കു എന്റെ കൂടെയുണ്ട്. ചിക്കു എന്നാണ് ഇവളെ ഞാൻ വിളിക്കാറുള്ളത്. ഇത്രയും കാലത്തെ സൗഹൃദമെന്ന് പറയുമ്പോൾ നിങ്ങൾക്ക് ഊഹിക്കാമല്ലോ ഞങ്ങൾ തമ്മിലുള്ള ബോണ്ട് എത്രത്തോളമായിരിക്കുമെന്ന്. ഞാനിവളെ ആദ്യമായി ഡാൻസാസിൽ വച്ചാണ് കാണുന്നത്. ഞങ്ങളൊരുമിച്ചുള്ള ഓർമ്മകൾ തുടങ്ങുന്നത് സത്യത്തിൽ അവിടെ നിന്നാണ്.

 ശ്രുതി: ഞങ്ങൾ രണ്ടുപേരും അമ്പലപ്പുഴക്കാരാണ്. ആലപ്പുഴ ചിന്മയ വിദ്യാലയത്തിലാണ് എൽ.കെ.ജി മുതൽ പ്ലസ് ടു വരെ രണ്ടാളും പഠിച്ചത്. അന്നത്തെ കുട്ടിക്കാല ഓർമ്മകളിൽ യാത്രയാണ് ഓർക്കാനേറ്റവും രസകരം. ഞാൻ അന്നൊരു ടോം ബോയിഷ് ലുക്ക് ആയിരുന്നു. എന്നാൽ അമ്മുവാണേൽ എപ്പോഴും അണിഞ്ഞൊരുങ്ങി സുന്ദരിയായേ നടക്കുള്ളൂ. അതിന് ഇപ്പോഴും ഒരു മാറ്റവുമില്ല(ചിരി). ഇവളെ വായ്നോക്കുന്ന സീനിയർ ചേട്ടന്മാർ മുതൽ ലൈൻബസിലെ ബസിലെ കിളിയെ വരെ ചീത്ത വിളിക്കുന്ന ഡ്യൂട്ടി എന്റേതായിരുന്നു.

ആതിര: ഇവളാണേൽ അവർ കമന്റ് അടിച്ചാൽ കണക്കിന് കൊടുക്കും. ഞാനിത്തിരി പേടിയുള്ള കൂട്ടത്തിലായിരുന്നു. അങ്ങനെ ഞങ്ങൾ ശല്യക്കാരില്ലാത്ത ബസിന് വേണ്ടി കാത്തിരിക്കുമായിരുന്നു അന്നൊക്കെ. സത്യം പറഞ്ഞാൽ ഇവളൊരു ധൈര്യമായിരുന്നു എനിക്ക്. ചിക്കു നിനക്ക് നമ്മുടെ ഡാൻസ് ടീം ഓർമ്മയുണ്ടോ?