പാർവതീദേവിയുടെ ഖീർഗംഗ

എല്ലാ സൗകര്യങ്ങളുമുള്ള ടെന്റിലെ താമസവും കൊടുംതണുപ്പിനെ വകവയ്ക്കാതെ ഒഴുകുന്ന ചൂടുള്ള അരുവിയിലെ കുളിയും... ഖിർഗംഗയിലെ ട്രെക്കിങ്ങിൽ നിറയെ അദ്ഭുതങ്ങളാണ് കാത്തിരിക്കുന്നത്

- SHEEBA MANOJ

പാർവതീനദിയുടെ തീരത്ത് പാർവതി വാലിയിലുള്ള ഒരു ചെറുഗ്രാമമാണ് കസോൾ. ശിവനും പാർവതിയും കസോളിൽ താമസിച്ചിരുന്നുവെന്നാണ് ഐതിഹ്യം. ശിവപാർവതിമാരുടെ ജീവിതകഥകൾ നിറയുന്ന ഐതിഹ്യവും കാഴ്ചകളുമാണ് കസോളിലുടനീളം കാണാനാവുക. അവിടെ നിന്നും അല്പം കൂടി മുന്നോട്ടു പോയാൽ ഖീർഗംഗയിൽ എത്താം. ട്രെക്കിങ്ങിനും അതിസുന്ദരമായ കാഴ്ചകൾക്കും പേരുകേട്ട ഇടം

സുന്ദരമായ കാഴ്ചകളാണ് വഴിയിലെങ്ങും. യാത്രയ്ക്കിടെ മരവും കൽപ്പാളികളും കൊണ്ട് നിർമിച്ച വീടുകൾ കണ്ട് അദ്ഭുതപ്പെട്ടു. കോൺക്രീറ്റിനും ഓടുകൾക്കും പകരം കല്ലുപാളികൾ കൊണ്ട് മേൽക്കൂരകൾ തീർത്ത വീടുകളായിരുന്നു അവയൊക്കെയും. കുറച്ചുകൂടി മുന്നോട്ടു പോകുമ്പോൾ ചില ക്ഷേത്രങ്ങൾ കാണാം. അതിലൊന്ന് ശിവക്ഷേത്രമാണ്. ശിവനും പാർവതിയുമാണ് പ്രതിഷ്ഠ. സ്ത്രീകൾക്ക് പ്രവേശനമില്ല. ദൂരെ നിന്ന് തൊഴുത് ഞങ്ങൾ യാത്ര തുടർന്നു. കുന്നിൻ ചെരിവിലൂടെ നടക്കുമ്പോൾ ശിവനും പാർവതിയും ഇപ്പോഴും ഇവിടെയുണ്ടെന്ന് തോന്നും. യാത്രയിലുടനീളം പാർവതീനദി നമ്മളെ പിന്തുടരും.

ഒരുദിവസം ഖീർഗംഗയിൽ ട്രെക്കിങ് നടത്തി അവിടെ താമസിച്ച്, അടുത്തദിവസം മടങ്ങാനായിരുന്നു ഞങ്ങളുടെ ലക്ഷ്യം. രാവിലെ പതിനൊന്നുമണിയോടെ ട്രെക്കിങ് ആരംഭിച്ചു. ഞങ്ങൾ താമസിച്ച ഹോം സ്റ്റോയുടെ ഉടമയായ ഓം ഭയ്യയുടെ മകൻ ഗൈഡായി ഞങ്ങളുടെ കൂടെ വന്നു. ട്രെക്കിങ്ങിനിടയിൽ ചിലപ്പോൾ താമസിക്കാൻ ചെറിയ മരത്താണ്ടുകൾ കൊണ്ടുള്ള കുടിലുകളാണ് കിട്ടുക. അല്ലെങ്കിൽ നമ്മൾ ടെന്റ് കൈയിൽ കരുതണം. ഒരു നല്ല സ്ഥലത്തെത്തുമ്പോൾ അവിടെ ടെന്റടിച്ച് താമസിക്കാം. അതുപോലെയാവും ഖീർഗംഗയിലെ ട്രെക്കിങ്ങുമെന്നാണ് കരുതിയത്.