സച്ചിൻ സ്വപ്നങ്ങളുടെ ഏകകം

ക്രിക്കറ്റെന്നാൽ സച്ചിൻ ആയിരുന്നു ഇന്ത്യക്ക്. കളമൊഴിഞ്ഞ് പത്ത് വർഷം പൂർത്തിയാകുമ്പോഴും നിറവേറ്റപ്പെട്ട ഒരുപിടി സ്വപ്നങ്ങളുടെ പ്രതീകമായി അയാൾ ആരാധകമനസ്സുകളിൽ കളി തുടരുന്നു

- പ്രവീണ

ഇംഗ്ലണ്ടിലെ ഗ്രീനിച്ച് നക്ഷത്ര  ബംഗ്ലാവിന് കുറുകെ ഒരു രേഖ കടന്നുപോകുന്നുണ്ട്. സമയസൂചികകളുടെ നിർണയത്തിനും ചലനത്തിനും ആസ്പദമായ  ഘടികാരങ്ങളുടെ  സമയരേഖ. നമ്മൾ ഇന്ത്യക്കാർക്കുമുണ്ട് അതുപോലെ സ്വപ്നങ്ങളെയും പ്രതീക്ഷകളെയും നിർണയിച്ച ഒരു ആനന്ദരേഖ. അത് കടന്നുപോകുന്നത് മഹാരാഷ്ട്രക്കാരനായ ഒരു ചുരുളൻ മുടിക്കാരന്റെ ഇരുപത്തിനാലുവർഷം നീണ്ട കളിക്കാലത്തിലൂടെയാണ്. സച്ചിൻ തെണ്ടുൽക്കർ കളിക്കളത്തിൽ അദ്ഭുതങ്ങൾ തീർത്ത ആ വർഷങ്ങളത്രയും ചേരുമ്പോൾ പൂർത്തിയാകുന്ന ആനന്ദഘടികാരത്തിന് ക്രിക്കറ്റ് എന്നുപേര്. 1989 നവംബർ 15-ന് കറാച്ചിയിൽ തുടക്കം. 2013 നവംബർ 16ന് ടെസ്റ്റ് കരിയറിലെ 68-ാം അർധശതകം തികച്ച് വാംഖഡെ മൈതാനത്ത് നിന്നും പവലിയനിലേക്ക് മടക്കം. ചലനം പൂർത്തിയാക്കിയത് ഒരു ഘടികാരമാണ്. സച്ചിന്റെ ക്രിക്കറ്റ് കാലം ഇന്ത്യയ്ക്ക് പ്രതീക്ഷകളുടെ കൊയ്ത്തുകാലം കൂടിയായിരുന്നു. കളിയവസാനിപ്പിച്ചിട്ട് വർഷം പത്ത് തികയുന്നു... എന്നിട്ടും പ്രതീക്ഷകളുടെ ഇന്ത്യൻ ഭൂപടമായി, സ്വപ്നങ്ങളുടെ ഏകകമായി സച്ചിൻ തുടരുന്നു...

പാഠം

പണ്ടുപണ്ട് റീൽസുകൾക്കും വ്ളോഗുകൾക്കും മുമ്പുള്ള കാലം. ഗ്രാമങ്ങളിലെ വീടുകളിൽ ടെലിവിഷൻ എത്തിത്തുടങ്ങിയിട്ടേയുള്ളൂ. ഒരേയൊരു ഭൂമി ഒരേയൊരു സൂര്യൻ എന്ന മട്ടിൽ ആകെയുള്ളത് ഒരൊറ്റ ദൂരദർശൻ. ആനന്ദം കടന്നുവരുന്ന വഴികൾക്ക് ചതുരാകൃതിയായിരിക്കുമെന്ന് കരുതാൻ തൊണ്ണൂറുകളിലെ കുട്ടികൾക്ക് അതൊന്നു മാത്രമായിരുന്നു കാരണം. അവരുടെ നിഘണ്ടുവിലെ ആനന്ദത്തിന്റെ ഒരേയൊരു പര്യായവും മൂന്നക്ഷരത്തിലൊതുങ്ങി. മില്ലേനിയൽസിന് എല്ലാം സച്ചിനായിരുന്നു. സങ്കല്പത്തേക്കാൾ ഭംഗി യാഥാർഥ്യത്തിനുണ്ടെന്ന ആശ്വാസകരമായ തിരിച്ചറിവ് ആ തലമുറയ്ക്ക് പകർന്നു കൊടുത്തത് സച്ചിനാണ്. കഥകളിലെ മായാരൂപിയല്ലാത്ത, ഒരു കേവല മനുഷ്യൻ ബാറ്റും ബോളും കൊണ്ട് അത്ഭുതങ്ങൾ തീർത്തപ്പോൾ അവരിൽ നിറഞ്ഞത് ജീവിതാസക്തിയാണ്. സാധാരണക്കാരനും അത്ഭുതകരമായ ജീവിതം സാധ്യമാണെന്ന തിരിച്ചറിവ് പകർന്ന പാഠമായിരുന്നു സച്ചിൻ. അങ്ങനെയാണ് സച്ചിൻ പ്രതീക്ഷകളുടെയും സ്വപ്നങ്ങളുടെയും ഏകകമായത്.

പിഴച്ച തുടക്കം