ജീവിതത്തെ ഐശ്വര്യപ്രദമാക്കുന്ന പിതൃസ്മരണയും കർമ്മവും

പിതൃക്കൾക്ക് നൽകാനുള്ള ആദരവും ശ്രേഷ്ഠ കർമ്മവും മുടക്കം കൂടാതെ ചെയ്യുക മാത്രമല്ല നമ്മുടെ ലക്ഷ്യം.

- സംഗീത മധു

അളകനന്ദയുടെ തീരപ്രദേശങ്ങൾ ഭരിച്ചിരുന്നത് രാമവർമ്മ മഹാരാജാവായിരുന്നു. അദ്ദേഹത്തിന് സുലോചനൻ, നീതിമുഖൻ, ഗോവർദ്ധൻ, ദേവമിത്രൻ എന്നിങ്ങനെ നാലുമക്കൾ ഉണ്ടായിരുന്നു.

വാനപ്രസ്ഥം സ്വീകരിക്കേണ്ട സന്ദർഭമെത്തിയപ്പോൾ രാജാവ് മൂത്തപുത്രനായ സുലോചനനെ രാജാവായി വാഴിച്ചു. കുറേ വർഷങ്ങൾക്കുശേഷം രാമവർമ്മനും പത്നിയും വാനപ്രസ്ഥത്തിനിടെ തന്നെ മരണപ്പെടുകയും ചെയ്തു.

ഇവരുടെ മരണാനന്തരച്ചടങ്ങുകൾ നാല് സഹോദരന്മാരും ആഡംബരപൂർവ്വം ഒന്നിച്ചാണ് നടത്തിയത്. ഒരു ജന്മത്തിൽ ഒരാൾക്കുണ്ടാകാവുന്ന യാതനകളും കഷ്ടതകളും ഇല്ലാതാകാൻ പിതൃകർമ്മങ്ങൾ ശ്രദ്ധയോടുകൂടി ചെയ്യണമെന്നാണ് ആചാര്യന്മാർ നിഷ്ക്കർഷിക്കുന്നത്. ശ്രദ്ധയോടുള്ള അനുഷ്ഠാനത്തിൽ നിന്നാണ് "ശ്രാദ്ധം' എന്ന പേരു തന്നെ വന്നത്.

അങ്ങനെ ഒരവസരത്തിലാണ് ഈ നാലുസഹോദന്മാരുടെ അരികിലേയ്ക്ക് വിശ്വാമിത്ര മഹർഷി യാദൃച്ഛികമായി കടന്നു വന്നത്.