കണ്ണിനും കരളിനും കുളിരേകുന്ന മേടപ്പുലരി

മേടമാസപ്പുലരി ഇതാ വന്നെത്തുകയായി. നമുക്കിത് വിഷുപ്പുലരിയാണ്. ദിവ്യവും ഹൃദ്യവു മായ ഒരു ഉഷഃസന്ധ്യയിലേക്ക് മിഴികൾ തുറക്കുന്ന അപൂർവ്വ അവസരമാണ്. സൂര്യൻ മീനം രാശിയിൽ നിന്നും മേടം രാശിയിലേക്ക് സംക്രമിക്കുന്ന ദിവസം. ഒരു വർഷത്തെ പ്രതീക്ഷാ പൂർവ്വം നോക്കിക്കാണാൻ മനുഷ്യൻ തയ്യാറാകുന്ന സമയം. അതാണ് വിഷു. വസന്തകാലത്തിന്റെ പ്രതിനിധിയായി എങ്ങുനിന്നോ സ്വാഗതഗാനവും പാടി വിദൂരതയിൽ നിന്നും പറന്നെത്തുന്ന വിഷുപക്ഷികൾ. നിറയെ പൂത്തുലഞ്ഞു നിൽക്കുന്ന കൊന്നമരം കണി കാണുന്നത് ഐശ്വര്വദായകം മാത്രമല്ല, കണ്ണിനും കരളിനും കുളിര് പകരുന്നതുമാണ്.

- ബാബുരാജ് പൊറത്തിശ്ശേരി 9846025010

രാവും പകലും തുല്യമായി വരുന്ന ദിവസത്തെയാണ് വിഷു എന്നുപറയുന്നത്. ഒരേസമയം പൗരാണികവും ജ്യോതിശാസ്ത്ര പരവുമായ പ്രാധാന്യം അതിനുണ്ട്. പണ്ടു കാലം മുതലെ സൂര്യനേയും ഭൂമിയുടെ പരിക്രമണത്തേയും മനസ്സിലാക്കി പഠിച്ച ഭാരതീയനെ സംബന്ധിച്ചിടത്തോളം ഇങ്ങനെയുള്ള രണ്ട് ദിവസങ്ങളാണ് തുലാസംക്രമവും മേട സംക്രമവും. രണ്ടുദിനങ്ങളും ഒരുപോലെ പ്രധാനപ്പെട്ടതാണ്. ഭൂമിയുടെ അനാദിയും അനന്തവുമായ യാത്രയ്ക്കിടയിൽ യാദൃച്ഛികമായി ഉണ്ടാകുന്ന ദിനങ്ങളാണത്. ഈ രണ്ട് ദിനങ്ങളിലും സൂര്യൻ നേരെ കിഴക്കുദിക്കുന്നു എന്നാണ് കണക്ക്. ഭാരതീയ കാലഗണനാ രീതി പ്രകാരവും പഞ്ചാംഗ പ്രകാരവും ഒരു പുതിയ വർഷാരംഭമായി വിഷുവിനെ കണക്കാക്കുന്നു. അതിനാൽ വിഷുവിന് സമാനമായ ആഘോഷങ്ങൾ ഭാരതത്തിലെ മറ്റ് സംസ്ഥാനങ്ങളിലും നിലവിലുണ്ട്.

വിഷുവുമായി ബന്ധപ്പെട്ട രണ്ട് ഐതിഹ്യങ്ങളാണ് നാം കേട്ടുവരുന്നത്. ശ്രീരാമൻ രാവണനുമേൽ വിജയം വരിച്ച ദിവസമായും, ശ്രീകൃഷ്ണൻ നരകാസുരനെ നിഗ്രഹിച്ച ദിവസമായും വിഷു കണക്കാക്കപ്പെടുന്നു. ഒന്ന് ത്രേതായുഗത്തിലാണെങ്കിൽ മറ്റേത് ദ്വാപരയുഗത്തിലാണ് എന്നുകൂടി ഓർക്കണം. യുഗാതീതമായ സംഭവങ്ങളെയും അനുഭവങ്ങളെയും വർത്തമാനകാല ആഘോഷങ്ങളുമായി ബന്ധപ്പെടുത്തുന്നതിന്റെ മറ്റൊരു ഉദാഹരണം കൂടിയാണിത്.

രാവണനുമായി ബന്ധപ്പെട്ട ഐതിഹ്യം, സൂര്യന്റെ സ്ഥാനവുമായി ബന്ധപ്പെ ടുന്നു എന്നുള്ളതിനാൽ പ്രസ്തുത ഐതിഹ്യത്തിന് കൂടുതൽ പ്രാധാന്യമുണ്ടെന്ന് തോന്നുന്നു. തന്റെ കൊട്ടാരത്തിലേയ്ക്കും അന്തപ്പുര ത്തിലേക്കും സൂര്യരശ്മികൾ നേരിട്ട് കടന്നുവന്നത് ഇഷ്ടപ്പെടാതിരുന്ന രാവണൻ സൂര്യദേവനെ നേരെ ഉദിക്കാൻ അനുവദിച്ചില്ല. പിന്നീട് രാമരാവണയുദ്ധത്തിനും രാവണവധത്തിനും ശേഷം ശ്രീരാമൻ സൂര്യഭഗവാനെ പൂർവ്വസ്ഥിതിയിലാക്കുകയായിരുന്നു. അതിന്റെ ആഘോഷമായിട്ടാണ് വിഷു നാടെങ്ങും കൊണ്ടാടാൻ തുടങ്ങിയത്.