പഞ്ഞിക്കെട്ടിലെ തീപ്പൊരി

ഏഴാം ഭാവാധിപൻ ശനിയുടെ കളികളാണിതെല്ലാം.

- ശങ്കരാടിൽ മുരളി 9074507663

കേരളത്തിലെ വലുതും ചെറുതുമായ നാൽപ്പത്തിനാല് നദികളിൽ രണ്ടെണ്ണം ഒഴിച്ച്, ബാക്കിയെല്ലാം കിഴക്കുനിന്ന് ഒഴുകി പടിഞ്ഞാറ് അറബിക്കടലിൽ ലയിക്കുന്നു. കമ്പനിയും, ഭവാനിയും സഹ്യനിൽ നിന്ന് ആദ്യം പടിഞ്ഞാട്ട് ഒഴുകി തിരിച്ച് കിഴക്കോട്ടു തന്നെ ഒഴുകി തമിഴ്നാടിനെയും കർണ്ണാടകത്തെയും തഴുകുന്നു. കാണുമ്പോഴും കേൾക്കുമ്പോഴും ഇതൊരു വിരോധാഭാസമായി തോന്നാം.

ഇതുപോലെയാണ് മനുഷ്യകഥകളും. കഥകൾ പറഞ്ഞാലും പറഞ്ഞാലും തീരുന്നില്ല. ഓരോന്നിനും ഒരുതരത്തിലല്ലെങ്കിൽ മറ്റൊരുതരത്തിൽ വ്യത്യസ്തതയോ പുതുമയോ കാണും. ഇവിടെ നിരുപമയ്ക്കും രാജാറാമിനും ഒരേ ഒരു മകളാണ് രൂപ. എം.ബി.ബി.എസ് കഴിഞ്ഞ്, ഡി.സി.എയും നേടി സർക്കാർ സർവ്വീസിൽ ജോലി ചെയ്യുന്നു. വയസ് 30 ആയിട്ടും വിവാഹം നടന്നില്ല.

ആലോചനകൾ വരുമ്പോഴും, കാര്യത്തോടടുക്കുമ്പോഴും വരട്ടെ പറയാം എന്ന ഒറ്റവാക്കിൽ മറുപടി. ഇത്തരം സന്ദർഭങ്ങളിൽ ദൈവത്തെ വിളിക്കുകയല്ലേ നിവൃത്തിയുള്ളൂ. മാതാപിതാക്കൾ അത് ചെയ്യുന്നുണ്ട്. അടുത്തപടി ജ്യോതിഷികളാണ്. ഹോട്ടലിലെ സാമ്പാറു പോലെയോ, ഒരു നാളിന്റെ വാരഫല പ്രവചനം അഞ്ച് പത്രമാസികകൾ നോക്കിയാൽ അഞ്ചുതരത്തിൽ കാണുന്ന പോലെയോ, ഒരോന്നു പറയും പരിഹാരം ചെയ്യും. ഏലസ്സുകളും, ജപിച്ചുനൽകുന്ന മന്ത്രച്ചരടുകളെയും രൂപ സ്വയം വില പ്രഖ്യാപിച്ചതിനാൽ അത്രയും പണം നഷ്ടമായില്ല.