નગરદેવી નગરચર્યાએ નીકળ્યાં ભાવિક ભક્તો ભાવવિભોર

મેયર પ્રતિભા જૈને પહિંદવિધિ કરી ૮.૫ કિલોમીટર લાંબી યાત્રાને પ્રસ્થાન કરાવ્યું

- 

ભદ્રકાળીમા ભવસાગર તારણહાર, અમદાવાદની રક્ષા કરનાર, લાલ ચૂંદડી ને મસ્તક સિંદૂર, દર્શન કરીને દુઃખ ભાગે હજૂર. અમદાવાદની રક્ષા કરતાં નગરદેવી મા ભદ્રકાળી આજે શહેરીજનોના ખબરઅંતર પૂછવા માટે નગરચર્યાએ નીકળ્યાં છે. આજના પાવન અવસર પર હજારોની સંખ્યામાં માઈભક્તો જોડાયા છે. આન..બાન.. શાનથી માતાજી અમદાવાદીઓને દર્શન આપવા માટે નીકળ્યાં છે, જેના કારણે આખો માહોલ ભક્તિમય બની ગયો છે.

અમદાવાદનાં નગરદેવી ભદ્રકાળી માતાજીની આજે સવારે ભવ્ય નગરયાત્રા નીકળી હતી, જેમાં મેયર પ્રતિભા જૈન અને સ્ટેન્ડિંગ કમિટીના ચેરમેન દેવાંગ દાણીએ પહિંદવિધિ કરી નગરયાત્રાને પ્રસ્થાન કરાવ્યું હતું. આ નગરયાત્રામાં માતાજીનો રથ, નાસિક ઢોલ, અખાડા ના કલાકારો, ભજન મંડળીઓ અને મોટી સંખ્યામાં વાહનોનો કાફલો જોડાયો હતો. ૨૬ ફેબ્રુઆરી એ અમદાવાદનો સ્થાપના દિવસ છે અને ૮.૫ કિ.મી. લાંબી નગરયાત્રામાં મોટી સંખ્યામાં માઈભક્તો ઊમટ્યા હતા.