સગીરોને સિગારેટ-પાન મસાલા વેચતા ૨૦૦ પાન પાર્લર માલિકની ધરપકડ

યંગસ્ટર્સની સાથે-સાથે સગીરો પણ નશાના રવાડે ચઢ્યાઃ અમદાવાદ પોલીસે સરપ્રાઈઝ ડ્રાઈવ યોજી દરેક પોલીસ સ્ટેશનમાં પાન પાર્લર, ગલ્લાના માલિક વિરુદ્ધ ફરિયાદ નોંધાઈ

- 

આજે જમાનો એટલો ફાસ્ટ થઇ ગયો છે કે યંગસ્ટર્સની સાથે-સાથે સગીરો પણ નશાના રવાડે ચઢી રહ્યાં છે. દેખાદેખી અને સોશિયલ મીડિયાના વધતા જતા ક્રેઝને લઇને બાળકો સગીર અવસ્થામાં આવે ત્યારથી નશાનાં આદિ બની જાય છે. સગીરોમાં વ્યસનની લત છૂટી જાય તે માટે પોલીસ એક્શન મોડ પર આવી છે. ગઇ કાલે અમદાવાદ પોલીસ દ્વારા સ્પેશિયલ ડ્રાઇવનું આયોજન કરવામાં આવ્યું હતું. જેમાં પાન પાર્લર, ગલ્લા તેમજ રેંકડી પર સગીરોને સિગારેટ, પાન મસાલા વેચતા લોકો વિરુદ્ધ કાર્યવાહી કરવામાં આવી હતી. ૨૦૦થી વધુ પાન પાર્લરના માલિકો વિરુદ્ધ શહેર પોલીસે બાળકોની સંભાળ અને સુરક્ષા અધિનિયમની કલમ-૭૭ મુજબ ગુનો નોંધીને ધ૨પકડ કરી છે.