સાત જિલ્લામાં આજે ઓરેન્જ એલર્ટ જારીઃ અંગ દઝાડતી ગરમી તોબા પોકારાવી દેશે

થોડા દિવસની આંશિક રાહત મળ્યા બાદ અમદાવાદમાં ૧૫ એપ્રિલથી ફરી ભીષણ ગરમીનો નવો રાઉન્ડ શરૂ થશેઃ હવામાત વિભાગની મોટી આગાહી

- 

હજુ તો એપ્રિલ મહિનાના માંડ આઠ દિવસ વીત્યા છે ત્યાં જ રાજ્યના મોટા ભાગના વિસ્તારોમાં કાળઝાળ ગરમી કહેર વરસાવી રહી છે. રાજ્યના સાત જિલ્લાઓમાં આજે હવામાન વિભાગ દ્વારા ભીષણ ગરમીનું ઓરેન્જ એલર્ટ જારી કરવામાં આવ્યું છે. હવામાન વિભાગે આ સાત જિલ્લાના લોકોને ચેતવણી આપતાં જણાવ્યું છે કે આજે બપોરે અંગ દઝાડતી ગરમી રીતસર તોબા પોકારાવી દેશે. અમદાવાદીઓ માટે પણ હવામાન વિભાગની નવી આગાહી સામે આવી ગઈ છે, જેમાં જણાવાયું છે કે આંશિક રાહત મળ્યા બાદ અમદાવાદમાં આગામી ૧૫ એપ્રિલથી ફરી એક વખત ભીષણ ગરમીનો નવો રાઉન્ડ શરૂ થશે, જે શહેરીજનો માટે બહુ આકરો સાબિત થશે.

અમદાવાદ સહિત ગુજરાતભરમાં એપ્રિલ મહિનાના આરંભ સાથે જ અંગ દઝાડતી ગરમીની શરૂઆત થઈ ગઈ છે. ગુજરાતમાં તાપમાનનો પારો છેક ૪૫ ડિગ્રીએ પહોંચતાં રાજ્યવાસીઓ ગરમીમાં શેકાઈ રહ્યા છે. કાળઝાળ હવામાન વિભાગે આગામી બે દિવસ પણ કાળઝાળ ગરમીનો અનુભવ કરવો પડશે તેવી આગાહી કરી છે. ગુજરાતમાં આજે કેટલાક વિસ્તારોમાં ઓરેન્જ તો કેટલાક વિસ્તારોમાં યલો એલર્ટ આપવામાં આવ્યું છે. આ સાથે અમદાવાદનું મહત્તમ તાપમાન ઉંચકાય તેવું અનુમાન પણ હવામાન વિભાગે લગાવ્યું છે.