પાંચ ઝોનની ૯,૪૬૯ મિલકત સીલઃ એક જ દિવસમાં ૮.૦૭ કરોડથી વધુનો ટેક્સ વસૂલાયો

મ્યુનિસિપલ ટેક્સ વિભાગની આક્રમક મેગા ટ્રિગર ઈવેન્ટ

- 

માર્ચ મહિનો પૂરો થવામાં હવે માત્ર નવ દિવસ બાકી રહ્યા છે ત્યારે બાકી પ્રોપર્ટી ટેક્સની વસૂલાત માટે મ્યુનિસિપલ ટેક્સ વિભાગ એકદમ આક્રમક મૂડમાં આવી ગયો છે. ગઈ કાલે શહેરભરમાં હાથ ધરાયેલી મેગા ટ્રિગર ઈવેન્ટમાં મ્યુનિસિપલ તંત્રની ટીમ દ્વારા સપાટો બોલાવી દેવામાં આવ્યો હતો અને શહેરના પાંચ મુખ્ય ઝોનની કુલ ૯,૪૬૯ મિલકતને સીલ કરી દેવામાં આવી હતી. એક જ દિવસમાં રૂ. ૮.૦૭ કરોડથી વધુના પ્રોપર્ટી ટેક્સની વસૂલાત કરવામાં ટેક્સ વિભાગ સફળ રહ્યો છે.

એક તરફ મ્યુનિસિપલ સત્તાધીશો દ્વારા ગત ૧૪ માર્ચથી ટેક્સ રિબેટ યોજના લાગુ કરવામાં આવી છે, જે આગામી ૩૧ માર્ચ સુધી ચાલશે. તંત્ર દ્વારા વારંવાર નોટિસ બજાવવાની કામગીરી કરવા છતાં પણ કેટલાક ડિફોલ્ટર્સ દ્વારા ઘણા લાંબા સમયથી બાકી પ્રોપર્ટી ટેક્સની ચુકવણી કરવામાં આવતી નથી. આવા ડિફોલ્ટર્સને પાઠ ભણાવવા માટે મ્યુનિસિપલ ટેક્સ વિભાગ દ્વારા દર શુક્રવારે મેગા ટ્રિગર ઈવેન્ટ યોજવામાં આવી રહી છે.