સાત યુવાનોનું ભાવિ બગડ્યું: ન્યૂઝીલેન્ડની વર્ક પરમિટને બહાને ૭૦.૯૦ લાખનું ચીટિંગ

ક્રાઈમ બ્રાંચે બે એજન્ટ વિરુદ્ધ ફરિયાદ નોંધીઃ અમદાવાદ અને મહેસાણાના યુવક-યુવતી પાસેથી રૂપિયા ખંખેર્યા

- 

અમેરિકામાં ગેરકાયદે ઘૂસણખોરી કરીને રહેતા ભારતીયોને ડિપોર્ટ કરવાની કાર્યવાહી ચાલી રહી છે ત્યારે હજુ પણ લોકોને વિદેશમાં સ્થાયી થવાની ઇચ્છાઓ વધી રહી છે. લાખો કરોડો રૂપિયા ખર્ચીને કેનેડા, અમેરિકા, ન્યૂઝીલેન્ડ સહિતના દેશોમાં સ્થાયી થવા માટે લોકો એજન્ટોનો સંપર્ક કરી રહ્યા છે. જેમાં કેટલાક એજન્ટો નિર્દોષ લોકોના રૂપિયા ચાંઉ કરીને ચીટિંગ આચરતા હોય છે. ક્રાઇમ બ્રાંચના આર્થિક ગુના નિવારણ શાખામાં સાત યુવાનોનાં ભવિષ્ય સાથે ચેડાં કરનાર બે એજન્ટ વિરુદ્ધ ફરિયાદ નોંધાઇ છે. ન્યૂઝીલેન્ડમાં વર્ક પરમિટ કરાવી આપવાની બાંયધરી આપીને બે એજન્ટે સાત યુવાનોનાં માતા- પિતા પાસેથી ૭૦.૯૦ લાખ રૂપિયા ખંખેરી લીધા હતા. ક્રાઇમ બ્રાંચના આર્થિક ગુના નિવારણ શાખાની ટીમે ગુનો નોંધીને તપાસ શરૂ કરી છે.