பீகார் முதலமைச்சராக நிதிஷ்குமார் பதவியேற்றார்!

2 துணை முதல்வர்கள், 24 அமைச்சர்களும் பதவியேற்றனர்; பிரதமர் மோடி, அமித்ஷா நேரில் வாழ்த்து!!

- 

பாட்னா காந்தி மைதானத்தில் பீகார் புதிய மந்திரிசபை பதவியேற்பு விழா இன்று முற்பகல் 11.30 மணியளவில் வெகு சிறப்பாக நடைபெற்றது. 10-ஆவது முறையாக பீகார் முதல்வராக நிதிஷ் குமார் பதவியேற்றார். அவருக்கு ஆளுநர் ஆரிப் முகமது கான் பதவிப் பிரமாணமும், ரகசியக் காப்புப் பிரமாணமும் செய்துவைத்தார்.

மேலும் 2 துணை முதல்வர்கள் மற்றும் 24 அமைச்சர்கள் பதவியேற்றனர். பிரதமர் மோடி, மத்திய அமைச்சர்கள், அமித்ஷா, ஜெ. பி. நட்டா, தர்மேந்திர பிரதான் மற்றும் பா. ஜ. க. முதல்வர்கள் விழாவில் பங்கேற்று நிதிஷ் குமாருக்கும், துணை முதல்வர்களுக்கும், அமைச்சர்களுக்கும் வாழ்த்து தெரிவித்தனர்.

பீகார் சட்டசபைக்கு இம்மாதம் 6-ஆம் தேதி மற்றும் 11-ஆம் தேதி என 2 கட்டங்களாக தேர்தல் நடத்தப்பட்டது. 14-ஆம் தேதி வாக்குகள் எண்ணப்பட்டன. 243 உறுப்பினர்களைக் கொண்ட சட்டசபையில் அறுதிப் பெரும்பான்மைக்கு 122 எம். எல். ஏ. க்கள் ஆதரவு தேவை. இந்நிலையில், தேசிய ஜனநாயகக் கூட்டணி 202 இடங்களில் வெற்றி பெற்று வரலாற்றுச் சாதனை படைத்துள்ளது.

பா. ஜ. க. 89 தொகுதிகளிலும், ஐக்கிய ஜனதா தளம் 85 தொகுதிகளிலும், லோக்ஜன சக்தி (ராம் விலாஸ்) 19 தொகுதிகளிலும், இந்துஸ்தானி அவாம் மோர்ச்சா 5 தொகுதிகளிலும், ராஷ்டிரிய லோக் மோர்ச்சா 4 தொகுதிகளிலும் வெற்றி பெற்றுள்ளன.

மகாகட்பந்தன் 35 இடங்களில் மட்டுமே வெற்றி பெற்றுள்ளது. ராஷ்டீரிய ஜனதா தளம் 25 இடங்களிலும், காங்கிரஸ் 6 இடங்களிலும், மார்க்சிஸ்ட் லெனினிஸ்ட் 2 இடங்களிலும், மார்க்சிஸ்ட் கட்சி 1 இடத்திலும், இந்தியன் இங்குளுசிவ் கட்சி 1 இடத்திலும் வெற்றி பெற்றுள்ளன. ஏ. ஐ. எம். ஐ. எம். 5 இடங்களிலும், மாயாவதியின் பகுஜன் சமாஜ் 1 இடத்திலும் வெற்றி பெற்றுள்ளன.