பிரதமர் மோடி நாளை வருகை: கோவையில் 5 அடுக்கு பாதுகாப்பு!

போக்குவரத்து மாற்றம்; டிரோன்கள் பறக்கத் தடை

- 

பிரதமர் நரேந்திர மோடி நாளை கோவை வருகிறார். இயற்கை விவசாயிகள் மாநாட்டில் கலந்து கொள்கிறார். அவரது வருகையை முன்னிட்டு 5 அடுக்கு பாதுகாப்பு போடப்பட்டுள்ளது. போக்குவரத்து மாற்றம் செய்யப்பட்டுள்ளது. டிரோன்களும் பறக்க தடை விதிக்கப்பட்டுள்ளது.

தென்னிந்திய இயற்கை வேளாண் கூட்டமைப்பு சார்பில் கோவையில் நாளை (நவ. 19) இயற்கை விவசாயிகள் மாநாட்டை பிரதமர் மோடி தொடங்கி வைத்துப் பேசுகிறார்.

கோவை கொடிசியா அரங்கில் நாளை முதல் 3 நாட்களுக்கு நடைபெறும் இயற்கை விவசாயிகள் மாநாட்டில் தென் மாநிலங்களைச் சேர்ந்த 50 ஆயிரத்துக்கும் மேற்பட்ட இயற்கை விவசாயிகள் பங்கேற்கின்றனர்.

இந்த மாநாட்டைத் தொடங்கி வைக்கும் பிரதமர் நரேந்திர மோடி, சிறப்பாகச் செயல்பட்ட 18 இயற்கை விவசாயிகளுக்கு விருதுகளை வழங்குகிறார். பின்னர், தமிழ்நாடு, கேரளா, ஆந்திரா, கர்நாடகா, புதுச்சேரி உள்ளிட்ட மாநிலங்களைச் சேர்ந்த 50 இயற்கை வேளாண் விஞ்ஞானிகளுடன் பிரதமர் கலந்துரையாடுகிறார்.