மசோதாக்களுக்கு ஒப்புதல்: குடியரசுத் தலைவருக்கும் கெடு

மாநில ஆளுநர்கள் முதலாவது முறையாக அனுப்பி வைக்கும் மசோதாக்கள் மீது மூன்று மாதங்களுக்குள் குடியரசுத் தலைவர் முடிவெடுக்க வேண்டும் என்று உச்சநீதிமன்றம் அண்மையில் அளித்த தீர்ப்பில் தெரிவித்துள்ளது.

- 

புது தில்லி, ஏப். 12:

தமிழக ஆளுநர் ஆர்.என். ரவி மசோதாக்கள் மீது முடிவெடுக்காமல் தாமதப்படுத்துவதாகக் கூறி, தமிழக அரசு 2023-இல் தொடர்ந்த வழக்கில் உச்சநீதிமன்றம் ஏப்.8-இல் தீர்ப்பளித்தது. அதில், ஆளுநர்கள் கடைப்பிடிக்க வேண்டிய நடைமுறைகள், காலக்கெடு மற்றும் வழிமுறைகளை நீதிமன்றம் நிர்ணயித்தது.

415 பக்க தீர்ப்பு: நீதிபதிகள் ஜே.பி. பார்திவாலா, ஆர். மகா தேவன் அடங்கிய அமர்வு கடந்த செவ்வாய்க்கிழமை (ஏப்.8) அளித்த இத்தீர்ப்பின் 415 பக்கங்கள் அடங்கிய விரிவான தீர்ப்பின் நகல், உச்சநீதிமன்ற இணையதளத்தில் வெள்ளிக்கிழமை (ஏப்.11) இரவு பதிவேற்றப்பட்டது. அதன் முக்கிய அம்சங்கள் வருமாறு:

இந்த விவகாரத்தில் மத்திய உள்துறை அமைச்சகம் பரிந்துரைக்கும் கால அட்டவணையை ஏற்றுக்கொள்வது பொருத்தமானது என்று கருதுகிறோம். குடியரசுத் தலைவரின் பரிசீலனைக்காக மசோதாக்களை அனுப்பி வைக்கும் ஆளுநரின் பரிந்துரை பெறப்பட்ட தேதியிலிருந்து மூன்று மாதங்களுக்குள் அவை குறித்து குடியரசுத் தலைவர் ஒரு முடிவை எடுக்க வேண்டும். ஏதேனும் தாமதம் ஏற்பட்டால், அதற்குரிய காரணங்களைப் பதிவு செய்து சம்பந்தப்பட்ட மாநிலத்துக்கு தெரிவிக்க வேண்டும். மாநிலங்களும் ஒத்துழைப்பை வழங்கி, எழுப்பப்படும் கேள்விகளுக்கு உரிய பதில்களை வழங்க வேண்டும், மத்திய அரசு அளிக்கும் பரிந்துரைகளை விரைவாகப் பரிசீலிக்க வேண்டும்.