உதகையில் முதல்வர் மு.க.ஸ்டாலினுக்கு உற்சாக வரவேற்பு

நீலகிரி மாவட்டம், உதகையில் புதிதாகக் கட்டப்பட்டுள்ள அரசு மருத்துவக் கல்லூரி மருத்துவமனை கட்டடங்களைத் திறந்துவைக்க சனிக்கிழமை வந்த முதல்வர் மு.க.ஸ்டாலினுக்கு கட்சியினர், பொதுமக்கள் உற்சாக வரவேற்பு அளித்தனர்.

- 

கோவை/உதகை, ஏப். 5:

உதகை அரசு மருத்துவக் கல்லூரி மருத்துவமனைக்கு புதிய கட்டடங்கள் கட்டப்பட்டுள்ளன. இந்தப் புதிய கட்டடங்களைத் திறந்துவைப்பதுடன் இங்கு வழங்கப்பட உள்ள மருத்துவ சேவைகளை முதல்வர் மு.க.ஸ்டாலின் ஞாயிற்றுக்கிழமை தொடங்கி வைக்கிறார்.

இதைத் தொடர்ந்து, ரூ.727 கோடியில் புதிய பணிகளுக்கு அடிக்கல் நாட்டுவதுடன் முடிவுற்ற திட்டப்பணிகளைத் தொடங்கி வைக்கிறார். பின்னர், பொதுமக்களுக்கு நலத்திட்ட உதவிகளை வழங்குகிறார்.

இதற்காக உதகைக்கு சனிக்கிழமை வருகை தந்த முதல்வர் மு.க.ஸ்டாலினை நீலகிரி மாவட்ட எல்லையான குஞ்சப்பனையில் மாவட்ட ஆட்சியர் லட்சுமி பவ்யா தன்னேரு, மாவட்ட காவல் கண்காணிப்பாளர் என்.எஸ்.நிஷா ஆகியோர் வரவேற்றனர்.

அப்போது, அங்கிருந்த பழங்குடியின மக்களைச் சந்தித்து முதல்வர் நலம் விசாரித்தார். மேலும், பழங்குடியின குழந்தைகளுக்கு இனிப்புகளை வழங்கினார்.