நேபாளத்தில் அமைதியை மீட்டெடுக்க ஆதரவு

நேபாள இடைக்கால அரசின் பிரதமர் சுசீலா கார்கியுடன் பிரதமர் நரேந்திர மோடி வியாழக்கிழமை தொலைபேசி மூலம் பேசினார். அப்போது, நேபாளத்தில் அமைதி-ஸ்திரத்தன்மையை மீட்டெடுக்கும் அவரது முயற்சிகளுக்கு இந்தியாவின் வலுவான ஆதரவை பிரதமர் மோடி உறுதி செய்தார்.

- 

நேபாள இடைக்கால பிரதமராக அண்மையில் பதவியேற்ற சுசீலா கார்கியுடன் தொலைபேசியில் உரையாடியுள்ள முதல் வெளிநாட்டுத் தலைவர் பிரதமர் மோடி ஆவார்.

அண்டை நாடான நேபாளத்தில் ஆட்சியாளர்களின் ஊழல் மற்றும் சமூக ஊடகங்களுக்கு விதிக்கப்பட்ட தடையால் வெகுண்டெழுந்த இளம் தலைமுறையினர், கடந்த செப்டம்பர் 8-ஆம் தேதி பெரும் போராட்டத்தில் ஈடுபட்டனர். அப்போது, காவல் துறையினரால் 19 பேர் சுட்டுக் கொல்லப்பட்டதால் பெரும் வன்முறை வெடித்தது.

நாடாளுமன்றம், உச்சநீதிமன்றம், அதிபர், பிரதமர், அமைச்சர்கள்-அரசியல்வாதிகளின் வீடுகள், அரசுக் கட்டடங்கள், காவல் நிலையங்கள் மற்றும் வணிக வளாகங்கள் சூறையாடப்பட்டு, தீக்கிரையாக்கப்பட்டன. வன்முறையில் 72 பேர் உயிரிழந்தனர்.