பத்தாம் வகுப்பு பொதுத் தேர்வில் 93.80% தேர்ச்சி

தமிழகத்தில் மாநில பாடத் திட்டத்தில் பத்தாம் வகுப்பு பொதுத் தேர்வில் 93.80 சதவீத மாணவர்கள் தேர்ச்சி பெற்றனர். கடந்த ஆண்டைக் காட்டிலும் தேர்ச்சி 2.25 சதவீதம் அதிகரித்தது.

- 

சென்னை, மே 16:

நிகழாண்டு அதிகபட்சமாக அறிவியல் பாடத்தில் 10,838 பேரும், கணிதத்தில் 10,256 பேரும் 100-க்கு 100 மதிப்பெண் பெற்றுள்ளனர். தமிழில் இந்த எண்ணிக்கை 8- ஆக உள்ளது.

தமிழக பள்ளிக் கல்வி பாடத் திட்டத்தில் பத்தாம் வகுப்பு பொதுத் தேர்வு மாநிலம் முழுவதும் 4,113 மையங்களில் கடந்த மார்ச் 28 முதல் ஏப். 15 வரை நடைபெற்றது. தேர்வெழுத 8 லட்சத்து 87 ஆயிரத்து 148 பள்ளி மாணவர்கள் பதிவு செய்தனர். அவர்களில் 4 லட்சத்து 36 ஆயிரத்து 120 மாணவர்கள், 4 லட்சத்து 35 ஆயிரத்து 119 மாணவிகள் என மொத்தம் 8 லட்சத்து 71 ஆயிரத்து 239 பேர் தேர்வில் பங்கேற்றனர். இடைநிறுத்தல் உள்ளிட்ட பல்வேறு காரணங்களால் 15,652 பேர் தேர்வில் கலந்து கொள்ளவில்லை.