இரண்டு கட்டங்களாக ஜாதிவாரி மக்கள்தொகை கணக்கெடுப்பு

மத்திய அரசு அறிவிப்பு

- 

புது தில்லி, ஜூன் 4: ஜாதிவாரி கணக்கெடுப்புடன் கூடிய மக்கள்தொகை கணக்கெடுப்பை இரண்டு கட்டங்களாக நடத்த மத்திய அரசு முடிவு செய்துள்ளது.

இதுதொடர்பாக மத்திய உள்துறை அமைச்சகம் புதன்கிழமை வெளியிட்ட அறிவிப்பில் கூறியிருப்பதாவது: ஜாதிவாரி கணக்கெடுப்புடன் கூடிய மக்கள்தொகை கணக்கெடுப்பு-2027-ஐ இரண்டு கட்டங்களாக நடத்த தீர்மானிக்கப்பட்டுள்ளது.

ஹிமாசல பிரதேசம், உத்தரகாண்ட் மாநிலங்கள், லடாக் யூனியன் பிரதேசம் மற்றும் ஜம்மு-காஷ்மீர் யூனியன் பிரதேசத்தில் இடம் பெற்றுள்ள பனிப் பிரதேசங்களில் வரும் 2026-ஆம் ஆண்டு அக்டோபர் 1-ஆம் தேதி ஜாதிவாரி கணக்கெடுப்புடன் கூடிய மக்கள்தொகை கணக்கெடுப்பு தொடங்கப்படும்.

நாட்டின் பிற பகுதிகளில் 2027-ஆம் ஆண்டு மார்ச் 1-ஆம் தேதி இந்தக் கணக்கெடுப்பு தொடங்கப்படும்.

கணக்கெடுப்பு தொடங்கும் தேதிகள் தொடர்பான அறிவிக்கை மக்கள்தொகை கணக்கெடுப்பு சட்டம் 1948-இன் பிரிவு 3-இன் கீழ் உத்தேசமாக வரும் 16-ஆம் தேதி அரசிதழில் வெளியிடப்படும் என்று தெரிவிக்கப்பட்டுள்ளது.

மூன்றாண்டுகளில் இந்தக் கணக்கெடுப்பு நடத்தி முடிக்கப்படும் என்று அரசு வட்டாரங்கள் தெரிவித்தன.

இந்த மிகப் பெரிய கணக்கெடுப்பில் 30 லட்சத்துக்கும் அதிகமான கணக்கெடுப்பாளர்கள் மற்றும் மேற்பார்வையாளர்கள் ஈடுபடுத்தப்படுவார்கள் என எதிர்பார்க்கப்படுகிறது.