உண்மையும், உண்மையாக இருத்தலும்!

‘நான் எப்போதுமே உண்மை மட்டுமே பேசும் பழக்கம் உடையவன்’ என்று ஒருவர் சொன்னால், அவர் சொன்ன ஆகப் பெரிய பொய் அதுவாகத்தான் இருக்க முடியும்.

- வழக்குரைஞர் த.இராமலிங்கம்

‘நான் எப்போதுமே உண்மை மட்டுமே பேசும் பழக்கம் உடையவன்’ என்று ஒருவர் சொன்னால், அவர் சொன்ன ஆகப் பெரிய பொய் அதுவாகத்தான் இருக்க முடியும். எப்போதும் உண்மையை மட்டுமே ஒருவர் பேச முடியுமா? பார்த்ததையும், கேள்விப்பட்டதையும், நம் மனதில் தோன்றுவதையும் அப்படியே பிறரிடம் சொன்னால் என்ன ஆகும் என்பதைக் கொஞ்சம் யோசித்துப் பாருங்கள்.

நாம் நமக்கும் உண்மையாக இருக்க வேண்டும்; பிறருக்கும் உண்மையாக இருக்க வேண்டும்.

நமக்கு உண்மையாக இருப்பது என்றால் என்ன? வாக்கு தவறாமல் இருத்தல்; சொன்ன சொல்லைக் காப்பாற்றுதல். ‘கற்பு எனப்படுவது சொல் திறம்பாமை’ என்றும், ‘நிற்கக் கற்றல் சொல் திறம்பாமை’ என்றும் கொன்றைவேந்தன் சொல்கிறது. வாக்கு தவறாமை என்பது வாழ்க்கைக்கு முக்கியம் என்பதை ஒளவை இப்படி வலியுறுத்துகிறாள். இந்த உயரிய கருத்தை, தயரதன் வாயிலாக நமக்குத் தெளிவுபடுத்துகிறான் கம்பன்.