சவால்களை வென்ற சாதனை!

விண்வெளி வீரர்களான சுனிதா வில்லியம்ஸ், பேரி வில்மோர் ஆகியோர் பூமிக்குத் திரும்பி வரலாறு படைத்திருக்கிறார்கள்.

- 

அவர்களுடன் சேர்ந்து நிக் ஹேக், அலெக்ஸாண்டர் கோர்போனா ஆகியோரும் திரும்பியுள்ளனர். தனிமைப்பட்ட நிலையில், பூமியிலிருந்து 400 கி.மீ. உயரத்தில் அமைந்திருக்கும் சர்வதேச விண்வெளி நிலையத்தில் அசாத்திய மனத்துணிவுடனும், தன்னம்பிக்கையுடனும் தங்களது உயிரைத் தக்க வைத்துக்கொண்டு காத்திருந்த அந்த இருவரையும் ஒட்டுமொத்த உலகமும் பிரமிப்புடன் பார்த்து வியக்கிறது.

கடந்த 286 நாள்கள் அண்டவெளியில் தனித்து விடப்பட்ட அந்த இருவரும், சுமார் 17 மணி நேரப் பயணத்துக்குப் பிறகு புதன்கிழமை அதிகாலை 3.30 மணியளவில் அமெரிக்காவின் ஃபுளோரிடா மாகாணத்துக்கு அருகில் பாராசூட்டுகளின் உதவியுடன் பாதுகாப்பாகத் திரும்பியபோதுதான் உலகம் நிம்மதிப் பெருமூச்சு விட்டது. சுனிதா வில்லியம்ஸ் உள்ளிட்ட இரு வீரர்களும் விண்வெளியில் தன்னந்தனியாகத் தங்கியிருந்த 286 நாள்களில் பூமியை 4,576 முறை சுற்றி வந்து, சுமார் 19.5 கோடி கி.மீ. தொலைவு பயணித்துள்ளனர் என்பதைக் கேட்கும்போதே தலை சுற்றுகிறது.

கடந்த ஆண்டு ஜூன் 5-ஆம் தேதி, அமெரிக்காவின் போயிங் நிறுவனம் தயாரித்த ஸ்டார்லைனர் விண்கலத்தில் நாஸா விண்வெளி வீரர்களான சுனிதா வில்லியம்ஸ், பேரி வில்மோர் ஆகியோர் சர்வதேச விண்வெளி நிலையத்துக்குச் சென்றனர். அங்கே எட்டு நாள்கள் தங்கி, தங்கள் ஆய்வை முடித்துவிட்டு பூமி திரும்புவது என்று திட்டமிடப்பட்டிருந்தது. ஆனால், ஸ்டார்லைனர் விண்கலத்தில் ஏற்பட்ட தொழில்நுட்பக் கோளாறு காரணமாக அவர்கள் பூமிக்குத் திரும்ப முடியாத சூழல் ஏற்பட்டது.