ராமேசுவரம் மீனவர்கள் மூவர் இலங்கை கடற்படையால் கைது

கச்சத்தீவு - நெடுந்தீவுக்கு இடையே திங்கள்கிழமை நள்ளிரவு மீன்பிடித்துக் கொண்டிருந்த ராமேசுவரம் மீனவர்கள் மூவரை இலங்கை கடற்படையினர் கைது செய்தனர்.

- 

ராமேசுவரம், மார்ச் 18:

ராமநாதபுரம் மாவட்டம், ராமேசுவரத்திலிருந்து 403 விசைப் படகு களில் 3,000-க்கும் மேற்பட்ட மீனவர்கள் மீன்வளத் துறை அனுமதி பெற்று கடலுக்குள் மீன் பிடிக்கச் சென்றனர். இவர்கள் திங்கள்கிழமை நள்ளிரவு கச்சத்தீவு - நெடுந்தீவுக்கு இடையே மீன் பிடித்துக் கொண்டிருந்த போது, அங்கு ரோந்துப் படகுகளில் வந்த இலங்கை கடற்படையினர் கென்னடி என்பவரது விசைப் படகைப் பறிமுதல் செய்தனர். மேலும், படகிலிருந்த மீனவர்கள் சங்கர் (53), அர்ச்சுனன் (35), முருகேசன் (49) ஆகிய மூவரையும் கைது செய்து, காங்கேசன்துறை கடற்படை முகாமுக்கு கொண்டு சென்றனர்.