திமுகவின் சாணக்கிய வியூகமும் தேமுதிகவின் அரசியல் நிர்ப்பந்தமும்!

தமிழகத்தின் அதிகார பீடத்தைத் தீர்மானிக்கும் அரசியல் திசைமானியாக வட தமிழகம் திகழ்வது போல, சென்னையை வெல்பவர்களே கோட்டையைக் கைப்பற்றுவர் என்பதை கடந்த அரை நூற்றாண்டு கால தேர்தல் வரலாறு உணர்த்தி வருகிறது.

- நமது நிருபர்

அதிலும், சென்னை, திருவள்ளூர், காஞ்சிபுரம், செங்கல்பட்டு, வேலூர், ராணிப்பேட்டை, திருப்பத்தூர், திருவண்ணாமலை, விழுப்புரம், கள்ளக்குறிச்சி, கடலூர் ஆகிய 11 வட மாவட்டங்களில் உள்ள 80-க்கும் மேற்பட்ட தொகுதிகளில் பெரும்பான்மை பெறுபவர்களே ஆட்சியைப் பிடிப்பர் என்பதும் கடந்த ஐம்பது ஆண்டுகள் தேர்தல் வரலாறு உணர்த்தும் பாடமாகும்.எனவேதான், இந்த வட மாவட்டங்களில் தனது ஆதிக்கத்தைத் தக்க வைத்துக் கொள்ள திமுக விரும்புகிறது.

2021-ஆம் ஆண்டுத் தேர்தல் முடிவுகளை ஆராய்ந்தால், வட மாவட்டங்களான திருவள்ளூர், சென்னை, காஞ்சிபுரம், வேலூர், திருவண்ணாமலை, விழுப்புரம் ஆகியவற்றில் திமுக 40 இடங்களைக் கைப்பற்றியது. அதிமுக 29 இடங்களை மட்டுமே பெற்றது. இந்த இடங்களின் வித்தியாசமே ஆட்சி மாற்றத்தின் உதயத்தைத் தீர்மானித்தது.

திமுகவின் வியூகம்:

அரசியல் களத்தில் எதிரெதிர் துருவங்களாகப் பயணித்த திமுகவும் தேமுதிகவும் முதன்முறையாகக் கரம் கோத்திருப்பது வட மாவட்டங்களில் புதியதொரு வாக்குச் சமன்பாட்டை உருவாக்ககூடும்.