அமெரிக்காவில் 'மதுரை'

அமெரிக்காவில் உள்ள பென்சில்வேனியா மாகாணத்தின் தலைநகரான பிலடெல்பியாவில் உள்ள அருங்காட்சியகத்தில் பல்வேறு நாடுகளிலிருந்து சேகரிக்கப்பட்ட கலைப்பொருள்கள் உள்ளன. மிக அழகுடனும், கம்பீரத்துடனும் காட்சி அளிக்கும் இதன் ஒரு பிரிவு தெற்காசிய கலைப்பொருள்களைக் கொண்டதாகும். இந்தப் பிரிவில் மதுரை மாநகரில் உள்ள கூடல் அழகர் பெருமாள் கோயிலிலிருந்து சேகரிக்கப்பட்ட மண்டபத்தின் பகுதியை மிக அழகாகக் காட்சிக்கு வைத்துள்ளனர். அந்த மண்டபம் பற்றிய குறிப்பும் அருகிலேயே உள்ளது.

- -கி. ஸ்ரீதரன் (தொல்லியல்துறை - பணி நிறைவு).

இந்த மண்டபத்தில் நுழைந்து நடுவில் அமர்ந்து, கலைநயத்துடனும் அழகுடனும் உள்ள நாயக்கர் காலச் சிற்பங்களை ரசித்து மகிழ இருக்கைகளை அமைத்துள்ளனர்.

பிலடெல்பியாவைச் சேர்ந்த அடிலைன் பெப்பர் கிப்சன், அவரது கணவர் தியோடர் மார்ஷல் இருவரும் தேனிலவுக்காக 1913-இல் இந்தியா வருகின்றனர். மதுரைக்கு வந்த போது, மண்டபத்திலிருந்து இடிந்து விழுந்த சிற்பங்களுடன் உடைந்த கல்தூண் பகுதிகளை விலை கொடுத்து வாங்குகின்றனர். இதை அவர்கள் 1919-இல் பிலடெல்பியா அருங்காட்சியகத்துக்கு அளித்தனர்.

'இந்தச் சிற்பங்கள் மதுரை கூடல் அழகர், மதனகோபால சுவாமி கோயில் வளாகத்திலிருந்து கொண்டு வரப்பட்டவையாக உள்ளன' என்ற குறிப்பும் அருங்காட்சியகத்தில் காணப்படுகிறது. இந்த மண்டபம் தொடர்பான செய்திகள் அடங்கிய 'கற்களின் கதை’ என்ற புத்தகமும் வெளியிடப்பட்டுள்ளது.

மண்டபம் 26 தூண்களை உடையதாக அமைக்கப்பட்டுள்ளது. பெரும்பாலான தூண்களில் காணப்படும் சிற்பங்கள் முகம், கை, கால் உடைந்திருந்தாலும் மதுரை நாயக்கர் கால சிற்ப - கட்டடக் கலைக்குச் சிறந்த எடுத்துக்காட்டாக விளங்குகின்றன.